مێژووی بەغدا، واتە مێژووی خوێن و کۆمەڵکوژی و دەستخەڕۆیی... پێویستە کورد ئاگادار بن کە ئەو قسەیەی مالکی (خوێن بە خوێن) دەنکە شقارتەیەکە بۆ ئاگرێکی گەورە... ئەمجارە، کۆمەڵکوژی تەنها لە بەغدا ناکرێ، بەڵکو دەگاتە هەموو بستێکی کوردستانیش کە دەستیان پێی بگا. ئەوەشی پێی وایە ئەو سەردەمانە بەسەر چوونە، شوانێکە و هاوکاری گورگە... دەستی شارستانەتی ناگاتە بەغدایەک ئەوە مێژووەکەی بێ. ئەو عارەبانەی ئێستا وەک لێقەوماو لەناوماندان یا خەریکی کاسبین، چاوەڕوانی ئەو ڕۆژەن تا دەستی خۆیان بوەشێنن... مێژوو بۆ خۆی دووبارە دەبێتەوە و ئێمەش چ وانەیەک فێر نهابین. ئەبوو موسلیمی خوراسانی عەباسییەکانی هێنایە سەر دەسەڵات کەچی بە فێڵ کوشتیان، ئیتر بۆ مالکی، کە کورد گەیاندییە ئەو پلە و پایەیە، تاڵەبانی و بارزانی نەکوژێ؟ هیوادارم سەرانی کورد لە خەو ڕابن.
1) لە سەردەمی عەباسییەکاندا خەڵکی بەغدا کەوتنە ناو بەرمەکییەکان و لە ماوەیەکی کەمدا دوایان بڕینەوە، لە کاتێکدا ژنێکی بەرمەکی بە شیری خۆی هارون ڕەشیدی بەخێو کردبوو و بەرمەکییەکان کاروباری دەوڵەتیان بەڕێوە دەبرد... وەک ئێستای کورد.
2) لە سەردەمی عوسمانییەکاندا و هەر لە بەغدا، کەوتنە گیانی مەمالیک، کە خۆیان لە جۆرجیا و داغستانەوە هێنابوویانن و ئەوانیش لە ڕەگەوە قڕ کران.
3) جوولەکەکانی بەغدا کە دیارە لە سەردەمی بابلییەکانەوە لەو ناوچانە ژیابوون، ساڵی ١٩٤١دا کۆمەڵکوژ کران و تاڵان کران و ئەوانەی مانەوە، دەرباز بوون و بوون بە بناغەی دەوڵەتی ئیسرائیل. جوولەکەکان ئەو ساڵەیان ناو ناوە "فەرهوودەکە". ئەو جوولەکەیەی مایەوە، لە سەردەمی بەعسدا بە تۆمەتی جاسووسی لە سێدارە دران.
4) دوو جار کوردی فەیلی لە بەغدا قڕ کران، یەکەمیان ئەو کاتە بوو بەغدا و کورد، وەک ئێستا لە گفتوگۆدا بوون و جاری دووەمیش لە دەوروبەری ئەنفالەکاندا.
