ڕێکەوتننامەی حوزەیران، لە نێوان مام حەسەن و عارەبێکدا...

دوێنێ باسی ساڵی ١٩٦٣مان دەکرد: گفتوگۆی شۆڕش و بەعسی ١٩٦٣ لە حوزەیراندا کۆتایی هاتبوو. پێشمەرگە، کە پێشتر لە ناوچەکەماندا بە بەر چاوانەوە بوون، بەرەو شوێنە عاسییەکان کشابوونەوە. عارەبی جبوور و عوبێد و ئەلبوڕەیاش و سەد تەڕەماشی تر بۆ تاڵان هاتبوونە ناوچەکەمان. هەرچییەکیان دەستکەوتبا دەیانبرد. من خۆم گسک و گڵۆڵە بەن و دەسترازم بە دەستیانەوە دیوە.

عارەبێکی شەل، بە تفەنگێکی پۆڵۆنییەوە، بە تاقی تەنها مێگەلە مەڕێکی ماڵێکی بە تاڵان برد. مام حەسەن، کە پیاوێکی ڕیشسپی بوو، ویستی چاکە لەگەڵ خاوەن مەڕەکەدا بکا و مێگەلەکە لە عارەبەکە بسێنێتەوە. بە کزییەکەوە چووە لای عارەبەکە و گوتی:

"یابە بۆ نایەی ڕێک بکەوین؟! هەندێ پارەت دەدەمێ و مێگەلە مەڕەکە مەبە".

عارەبەکە گوتی: عەلە عێنی! دەی  با ڕێک بکەوین.

ئەویش پێنج دیناری دەرهێنا و گوتی: فەرموو ئەو پارەیە ببە و واز لە مەڕەکان بێنە.

کابرای عارەب، پێنج دینارەکەی وەرگرت و خستییە گیرفانییەوە. ئەوجا میلی تفەنگی ڕاکێشا و گوتی: "هەتا نەمکوشتوی بگەڕێوە، دەی!". ئیتر هەم مێگەلە مەڕەکەی برد، هەم پێنج دیناری مام حەسەنیشی خستە گیرفانییەوە.

من بەو گفتوگۆیەی مام حەسەن و ئەو عارەبە، یەکسەر ئەنجامی گفتوگۆی کورد و بەغدام بیر کەوتەوە: ئەرێ خۆ هەموو ڕێکەوتن و گفتوگۆی کورد لەگەڵ بەغدادا هەمان ئەو ئەنجامەی هەیە!! هەمیشە بۆ ڕیش دەچین و سمێڵ دادەنێین! کورد لە سەر ئاستی تاکەکەسی، ئەو ئاڵووێرە لەگەڵ عارەبدا دەزانێ، بەڵام سەرانی کورد تێناگەن و تێناگەن!!