کۆنگرەی نەتەوەیی

کۆنگرەی چی؟!... نەتەوەیی؟

تا ئێستا زۆر باسی کۆنگرەی نەتەوەیی کراوە بەڵام بە دەگمەن نەبێ، کەس نەیزانیوە خەم و پەیام و ئامانجی نەتەوەیی چین؟ ئیسلامییەکی توندڕەو، لەو بابەتانەی کوردی نەتەوەیی دەکەنە قوربانی تاکە پێڵاوی ئیماندارێکی ئەوسەری دنیا، داوا دەکا لە کۆنگرەی نەتەوەییدا ڕۆڵی هەبێ. چەپی توندڕەوی تیژ و تێژ، کە خاک و نەتەوە دەکاتە قوربانی بازووی بە بەردبووی یەکێ لەو کرێکارە کۆیلانەی کە بەشدارییان لە دروستکردنی ئەهەامەکانی میسردا کرد، دەیەوێ ئیمامی کۆنگرە بێ!. هەموو دەیانەوێ جڵەوی نەتەوە بگرنە دەست و بە کەیفی خۆیان، لە ناو خوێنی خۆیدا گێرەی پێ بکەن... فایلدار و کۆنە بەعسی و پیاوی موخابەراتی هەر چوار ئیقلیمی دنیا، لە سەر ئاڕاستەکردنی نەتەوەیەک کە هەزار و پێنج سەد ساڵە ژێردەستەیە و وەک سەرەتان خۆی، خۆی دەخوا، هەرایانە و مەسەلەش ئەوەیە ڕکێفی کوردایەتی و مرۆڤایەتی کورد لە دەستی عارەب و تورک و فارس دەرنەچێ!

ئەوانە کۆنگرەی نەتەوەیی دەبەستن کە دەروازە و سنوور لە ژن و منداڵی کوردی ڕۆژاوا دادەخەن تا بە ئاسانی ببنە کۆیلە و سەراری و (ماملکت ایمانهم)ی نەوەکانی ئەبوو جەهل و کەمتیارەکانی بیابان!

کەرەسەی کۆنگرەی نەتەوەیی هەمان ئەو کەرەسەیەیە کە بوو بە مامانی لەدایکبوونی ماددەی ١٤٠ و دەستبەرداری ناوچە داگیرکراوەکانی باشووری کوردستان بوو و هەمان ئەوەیە پەنجا ساڵە خەریکی گفتوگۆیە و تایبەتمەندی لە دۆڕاندنی گفتوگۆ و خاک و کەرامەتی کورد بەدەستهێناوە و لە دۆڕاندن بەردەوامە!! کۆنگرەی نەتەوەیی ئەوانە هەڵیدەسووڕێنن لەشکری عیراقیان دروست کردەوە و دەوڵەتی عیراقیان لە پارچەپارچەبوون دەرباز کرد و هەزاران گەنجی کوردیان شوێنبزر کرد. ئەوانەی خەریکی کۆنگرەی نەتەوەیین، هەر دوێنێ لە خەمی ئەوەدا بوون عیراق لە ژێر بەندی حەوتەمی نەتەوە یەکگرتووەکان دەربکەن تا بۆ گیانی کورد بەهێز بێ...

ئەو شیعرەم بیر دێتەوە کە لە پۆلی سێیەمی سەرەتایی دەمانخوێند، بەڵام نازانم شاعیرەکەی کێیە:

ڕۆژێ ما ڕێوی ئەهات دەم بە وێرد و سەڵاوات

دوایی ئەیوت بە ئاواز لەعنەتی خوا لە فێڵباز...

ئەوە نابێتە کۆنگرەی نەتەوەیی لە سێبەری کۆمپانیای نەوتدا ببەسترێ و فەرمان لە ئەنقەرەوە بۆ داخستنی سنووری ڕۆژاوا بێ و دەمودەست جێبەجێ بکرێ. ئەوە هەڵکەندنی گۆڕی نەتەوەییە و بێهیواکردنی سەرجەمی نەتەوەیەکە لە  خۆی و نەتەوەییەکانی. ئاخر من دەزانم لای دەسەڵاتی کوردی، نەتەوایەتی لە تلیاک قاچاغترە ئیتر کۆنگرەی نەتەوەیی چ واتایەکی دەمێنێ؟. پێنج ساڵە نەتەوەییەکان (بە تایبەتی لە کەرکووک) داوای بنکەیەک یا بارەگایەک یا هاوکارییەکی ماددی دەکەن تا برەو بە کەلەپووری کوردی و ئەدەبی نەتەوەیی بدەن و هەوڵێک بۆ ئەوە بدەن کەرکووک لە قوڕگی حەزیای ١٤٠ دەربێنن، کەس ئاوڕی لێیان نەدایەوە و ئەگەر ناوی ئەو بەڕێزانە بێنم کە ئامادەی هیچ هاوکارییەک نەبوون و هەندێکیان تەنانەت بواری یەک دیداریشیان نەدا، خوێنەری کورد سەرسام دەبێ! ئەوانە کۆنگرەی نەتەوەیی ئەنجام دەدەن؟! ئەوانە، ئەگەر خەریکی نەتەوایەتی کورد بن، ئەنجام ئەوە دەبێ دەڵەگورگە بۆرەکانی تورک بتەرەکێن!

نابێ ئەوەشمان لە بیر بچێ کە هەر هەوڵێک بۆ بەستنی کۆنگرەی نەتەوەیی لە هەندەران درابێ، هەر ئەمانەی ئێستا پشتی ملیان بۆ نەتەوە دەخورێنن، تێکیان داوە چونکە ویستوویانە خۆیان، لە هەموو بوارێکدا کوێخا بن! ئەوانە لە هەر بوارێکدا لێهاتوو بن، لە بواری نەتەوایەتیدا کۆڵەوارن و هەر کۆنگرەیەکی نەتەوەیی ئەوان سەرپەرشتی بکەن بۆ لەگۆڕنانی سەرجەمی نەتەوەکەمانە!

ئەرێ با نموونەیەەک بێنمەوە: کچی گوندێک مێردی کرد و بردیانە گوندێکی زۆر دوور. پاش چەند ساڵێک، خزمێکی ڕێی دەکەوێتە ئەو گوندە و دەچێتە ماڵی ئەو ئافرەتە. ئەویش پرسیاری خزموکەس و خەڵکی گوندەکەیان دەکا. کابرا دەڵێ: وەڵڵا هەموو شتێ باشە و بە دڵی تۆیە. فڵان مێردی کرد و فڵان باری کرد و ئەوی تر نازانم چی کرد... حەمەی براشت بۆتە کوێخا!

ئافرەتەکەش دەڵێ: ئەی قوڕ بە بان سەرم! بەو خوایە حەمە کوێخا بێ دێیەکەمان پیاوی تێدا نەماوە!!