دۆن کیشۆت و سەرانی کورد

 

... دۆن کیشۆت لەم بەشەی داستانەکەدا، چ بەزمێێک بەو کوڕیژگەیە دەکا، سەرانی کورد هەمان بەزمیان بە کورد کردووە و پێی دەکەن. بەڵام دۆن کیشۆت لە ڕووی دڵسۆزییەوە و سەرانی کورد لە ڕووی چاوچنپۆکییەوە. دۆن کیشۆت بەرژەوەندی خۆی نازانێ و سەرانی کورد، جگە لە بەرژەوەندی خۆیان، هیچی تر نازانن...

فەرموون بیخوێننەوە و بەراوردێ بکەن:

:

.

کە دۆن کیشۆت خانەکەی جێهێشت ڕۆژ ببۆوە. ئەوەندە بەوە بەختەوەر و شادمان بوو کە بە تێهەڵدان بوو بە پاڵەوان، زۆری نەمابوو لە خۆشییاندا تەنگەی ئەسپەکەی کون بکا. بەڵام کە ئامۆژگارییەکانی خانچییەکەی دەربارەی پارە و پێداویستی تری پاڵەوانانی گەڕۆک بیر کەوتەوە، بڕیاری دا بەرەو لای مڵکەکانی بگەڕێتەوە، تا ئەو پێداویستییانە بەدەست بێنێ، کە هەمیشە پاڵەوانان پێیان دەوێن. بۆ ئەوەش بیری لە جووتیارێکی هەژار و خێزاندار کردەوە کە لە کێڵگەیەکی نزیک دەیناسی و پێی وابوو بۆ ئەوە دەبێ بیکاتە مەیتەری خۆی.

ڕۆسینانتی بەرەو ماڵەوە وەرچەرخاند و پێدەچوو ئەسپەکەش ڕێیەکەی ناسیبێتەوە بۆیە بە شێوەیەک دەستی کرد بە غار، هەر ئەوە بوو سمی بە زەوی دەکەوتن. هێشتا زۆر نەڕۆیشتبوو، گوێی لە کڕووزانەوەیەک بوو کە لە لێواری دارستانەکەوە دەهات. بە ئاستەم گوێی لە دەنگەکە بوو، بەڵام پاڵەوان هاواری کرد:

- هەی لەو خوایە بەزیاد بێ وا زوو فرسەتی بۆ ڕەخساندم تا بە ئەرکی پاڵەوانێتی خۆم هەستم. ئەو هاوار و زارییە لە کەسێکەوەیە کە پێویستی بە یارمەتی هەیە.

سەری ڕۆسینانتی بەرەو ئەو جێیە وەرچەرخاند کە پێی وابوو دەنگەکەی لێوە دەهات. هەر وا کەمێک چووە ناو دارستانەکەوە، بارگیرێکی دیت کە بە داربەڕوویەکەوە بەسترابۆوە و ڕمێکیش بە هەمان دارەوە هەڵپەساردرابوو، کوڕیژگەیەکیش کە هەتا ناوقەدی ڕووت بوو، بە دارێکی ترەوە بەسترابۆوە. ئەو کوڕە بوو هاواری دەکرد. هۆکاری ئەو هاوارەش ئەوە بوو گوندییەکی کەتە بە قایشێک لێی دەدا و لەگەڵ هەر لێدانێکیشدا، یا بۆڵەیەکی دەکرد یا ڕێنمایی دەکرد.

- لە ئێستا بەدواوە، دەمت دادەخەیت و چاووت دەکەیتەوە.

کوڕیژگەکە، وەڵامی دایەوە: - جارێکی دی وا ناکەم، گەورەم، بەو خوایە ئیدی باشتر چاووم لە حەیوانەکان دەبێ.

کە دۆن کیشۆت چاوی بەو وەزعە کەوت، بە تووڕەیی هاواری کرد:

- ئەی پاڵەوانی نامەرد... لەکەسێکی بێدەسەڵات مەدە! وەرە سواری ئەسپەکەت بە و ڕمی خۆت بە دەستەوە بگرە تا تێتبگەیەنم کارێکی چەند ترسنۆکانە دەکەیت.

کە گوندییەکە ئەو شتە چەکدارە سەیرەی بە دیار خۆیەوە دیت وا نووکی ڕمەکەی لە بەر لووتی ڕاگرتووە، بە ترسەوە گوتی:

- ئەم کوڕیژگەیە، یەکێکە لە ڕەنجبەرەکانم، قوربان. بۆیە تەمێی دەکەم ئەوەندە بێخەمە، هەر ڕۆژە و زەرەری مەڕێکم لێ دەدا. کە لە سەر خەمساردییەکەشی سزای دەدەم، دەڵێ گوایە لەبەر ڕەزیلی ئەوە دەکەم بۆ ئەوەی هەقەکەی بخۆم، ئەوەش درۆیە.

دۆن کیشۆت هاواری کرد:

- لە حزووری مندا درۆ ناکا. بەو خودایە دەڵێی بەم ڕمە کونت کەم! یەڵڵا دەی، هەر ئێستا بەریدە و هەقەکەشی چەندە، بیدەیە و قسە مەکە، دەنا کۆتایی بە ژیانی نەحست دێنم.

گوندییەکە، سەری ڕاوەشاند و بێ ئەوەی هیچ بڵێ، کوڕیژگەکەی کردەوە. دۆن کیشۆت لە کوڕەکەی پرسی ئاخۆ چەندی قەرز لە سەرە، ئەویش گوتی:

- هەقی نۆ مانگم لە سەرێتی و هەر مانگەش حەوت ڕیاڵە.

دۆن کیشۆت حیسابەکەی لێکدایەوە کە دەیکردە شەست و سێ ڕیاڵ، ئەوجا فەرمانی بە گوندییەکە دا هەر لە جێ هەقەکەی وێدا. گوندییەکە، دڵنیای کرد کە پارەکە ئەوەندە ناکا، چونکە دەبێ لەو پارەیە هەقی سێ جووت پێڵاو دەربکرێ کە بۆ کوڕەکە کڕدراوون جگە لەوەی کاتێ نەخۆش کەوت، ڕیاڵێکی لێ سەرف کردووە.

دۆن کیشۆت گوتی:

- ئا، ئەوە ڕاستە. بەڵام دەبێ پارەی پێڵاو و دەرمان لە جیاتی ئەو لێدانە بقەبڵێندرێ، کە بە ناهەقی لێت دا.

- بەڵێ، بەڵام کاری خراپ لەوەدایە کە من ئێستا پارەم پێ نییە تا بیدەمێ. لەبەر ئەوە، وا چاکە ئەندریا لەگەڵمدا بێتەوە ماڵێ تا دواقرۆشی وێدەم.

کوڕەکە هاواری کرد:

- لەگەڵیدا بچمەوە ماڵێ؟! نا بەخوا، هێندە بێعەقڵ نیم. هەر لە تۆ دابڕێین و بە تەنها بین، بە زندوویی کەوڵم دەکا.

دۆن کیشۆت، بە توندی گوتی: "نا، نا. دڵنیابە! ئەوەندە بەسە کە من پێی بڵێم شتی وا نەکەیت. بەڵام دەبێ بە مەزەبی پاڵەوانان، کە خۆشی یەکێکیانە، سوێند بخوا ئەوەی گوتم جێبەجێی بکا و هەقی خۆتت بداتێ، ئەوجا ڕێی دەدەم بروا".

منداڵەکە گوتی: "جەنابی پایەبەرز، بیر لە قسەکەت بکەرەوە. ئاغاکەی من نە پاڵەوانە و نە سەر بە هیچ مەزەبێکی پاڵەوانانە. ئەو، خوان هاڵدودوە دەوڵەمەندەیە کە خەڵکی ناوچەی کینتانە".

دۆن کیشۆت وەڵامی دایەوە:

- قەیدی نییە. خۆ دەبێ پاڵەوانی وا تەنانەت لە ناو بنەماڵەی هاڵدودشدا هەڵکەوتبێ کە بە شاکارێکەوە ناسرابێ.

- بەڵێ، ئەو شاکارەی کە ئاغام پێوە ناسراوە، ئەوەیە هەقی کارەکەم نەدا کە مافی ڕەوای خۆمە.

گوندییەکە هاتە دەنگ و گوتی: "ئەندریا. من بە هیچ جۆرێ نیازم نییە مافی تۆ بخۆم. وەرە دوام کەوە بۆ ماڵەوە، سوێند بە هەموو مەزەبێکی پاڵەوانان دەخۆم، کە دوا ڕیاڵی هەقەکەت، بە ڕیباشەوە بدەم".

دۆن کیشۆت گوتی:

- مەسەلەی ڕیبا گرنگ نییە. تۆ ڕیاڵەکانی خۆی بدە، ئیدی هەموو شتێ چاک دەبێ. بەڵام دەبێ بە ڕاستی ئەوە بکەیت دەنا دێمەوە و سزات دەدەم. ئەوەش بزانە کە دەرباز نابیت و ئەگەر لە کونی بەردیشدا، وەک قمقمۆک خۆت حەشار بدەیت، هەر دەتدۆزمەوە. ئەگەر دەشتەوێ ئەوەی فەرمانت پێ دەکا کێیە، بزانە ئەوە منم، دۆن کیشۆتی مانش، کە دژی هەموو ناعەدالەتییەکی جیهان دەجەنگم. خواحافیز و لە بیرت نەچێ سویندت بە چی خوارد! ئەوەی گوت و هەی لە ڕۆسینانت کرد و ئەوەندەی بڵێی یەک و دوو، لە بەر چاو ون بوو.

گوندییەکە، چاوی تێ بڕی هەتا بزر بوو. دوای ئەوە، بەرەو ئەندرێ وەرچەرخا و گوتی:

- وەرە با چ قەرزێکت لە سەرمە، بە پێی فەرمانی پەنای بێپەنایانت بتدەمێ.

ئەندرێ گوتی: "بەڵێ ئاغام، کە بە گوێی ئەو پاڵەوانە دادپەروەرە دەکەیت، کارێکی ژیرانە دەکەیت، دەنا دەگەڕێتەوە و ئەو بەڵێنەی کە دای، جێبەجێی دەکا.

- "سوێند دەخۆم کە قەرزەکەت دەدەمەوە. وەرە بزانە چەندم خۆش دەوێی". دوای ئەوەی گوندییەکە ئەوەی گوت، بەربووەوە وێزە کوڕیژگەکە. بە دارەکەوەی بەستەوە و بە دڵوداو کەوتەوە لێدانی.

- دەبینی ئەندرێی خۆشەویست؟ ئێستا دەچی بانگی فریاڕەسەکەت دەکەی تا بزانی چەند بە ئاسانی مافت دەسێنێ. پێم وایە هێشتا هەقی خۆت نەسەندووە. حەزم لێیە، وەک خۆت گوتت، بە زندوویی کەوڵت بکەم.