حەکیم کاکەوەیس
کوردی باشوور، لە ڕێی حیزبە سەرکییەکان و
کۆمۆنستەکانەوە، وەها خۆی بە عیراقەوە شەتەک دابوو و ئەوەندە خۆی بە عیراقی
دەزانی، سەرفرازی و دەوڵەتی کوردستان و تەنانەت هەندێ جار وشەی کوردستانیشی بە
لاوە گاڵتەجاڕی بوو. کورد، شانبەشانی عارەب لە دژی ئینگلیز شەڕی کرد و دژی
ئیسرائیل خەباتی کرد و شین و واوەیلای بۆ زاڕۆکی فەلەستین کرد... کورد، وەها
ڕیخەڵۆکی لە ڕیخەڵۆکی عارەب ئاڵابوو، زەحمەت بوو لێکیان دابڕیت.
لەگەڵ هەموو ئەوانەشدا، تۆمەت بۆ کورد هەڵبەسترا و کرا
بە جنۆکە و پیاوی ئیسرائیل و هەرچییەکی خوا پێی خۆش نییە، ئەوجا دەست کرا بە
ئەنفالکردن و کیمیابارانکردن و ڕاگواستنەوەی و دیتمان چی بە ئێزیدییەکانیش کرا.
ئێستا، عارەب لێیان قەوماوە و هانا بۆ کورد دێنن. هەمان
ئەوانەی کوردیان دەکوشت و تاڵان دەکرد، لای کورد پەنابەرن: کورد بوو بەو پیاوەی
عارەب پەنای بۆ بێنێ!! دیتمان چۆن داعش پێشمەرگەی خستبووە قەفەزەوە و بە ناو
حەویجەدا دەیانسووڕاندنەوە و سووکایەتییان پێ دەکردن، کەچی ئێستا هەر ئەوانە، بە
زەلیلی کەوتوونەتە بەر دەستی کورد.
نەفسی عارەب ئەوەی قەبووڵە؟! نەفسی عارەب بەوە ڕازییە
کۆیلە و موالییەکانی دوێنێ خۆی بڕیار بدەن ئەو "سەیید"انە چۆن بژین و لە
کوێ بژێن؟!
من دڵنیام ئەگەر ئەمجارە باری کورد خوار بێ و بکەوێتە
لێژی، لە ڕەگەوە قڕ دەکرێ... ئەگەر ئەمجارە کورد بکەوێتەوە بن خێمەی دەوڵەتی
عیراقەوە، بە کۆیلایەتیش لێمان خۆش نابن. پرسیاری من ئەوەیە: سەرانی چاوچنۆکی کورد
بیر لەوە دەکەنەوە چۆن کورد بخەنەوە بەر دەستی عارەب؟!
لە ڕاستیدا، کورد بە کەڵکی ئەوە نەماوە بکەوێتەوە بەر
دەستی عارەب، چونکە هەرگیز عارەب بە قەرز نەترساوە. لە کاتێکدا خۆیان زەلیل بوون،
پێشمەرگەی دیلیان زەلیل دەکرد و بیریان لەوە نەدەکردەوە باریان خوار دەبێ و حەشدی
شیعەیان لێ پەیدا دەبێ!! ئێستاش لە سبەینێ ناترسن... دەستیان بڕوا، بە پەنابەریش
خاکمان داگیر دەکەن!!
لە ڕۆژاوای کوردستانیش، بارودۆخ ترسناکترە. کورد لە
ڕۆژاوا، وەک هاوڵاتی تەماشا نەدەکرا و هەندێ جار سەربازی کوردیان تەنها لەبەر
کوردبوون دەکوشت و لە بیریان چووبوو کە کورد شەڕی فەرەنسای کردبوو و دەستی لە
دروستکردنی دەوڵەتی سووریادا هەبوو. ئەی ئەگەر بە لووتی شکاو و پاشەڵی هەڵدڕاوەوە
خۆیان ببیننەوە دەبێ چۆن بن!! هەر هەنگاوێک بۆ پێکەوەژیان لە سووریا بندرێ، هەنگاوە
بۆ قڕکردنی کورد. دەکرا کورد لە ڕۆژاوادا بە کۆیلایەتی، وەک دەیان ساڵ لەمەبەر
بژێ، بەڵام ئێستا دەرفەتی کۆیلایەتیش نەماوە و کەوتۆتە سەر دووڕێیان: یا سەرکەوتن
و سەربەخۆیی، یا قڕبوون و نەمان!
ئەگەر ئەمەریکا و ڕووسیا لەم شەڕانەدا دەستی کورد بە
زاخدا بکەن (وەک پێشتر کردوویانە)، ڕێک دەکاتە ئەوەی بڕیاری قڕکردنی کوردیان دابێ.
دەوڵەتی تورک و ئێران و عیراق و سووریا، گرەو لە سەر ئەو گەمەیە دەکەن. ئەی تۆ
بڵێی سەرانی تێرنەخۆرەی کورد بیریان لەو ڕاستییانە کردبێتەوە؟!
گومانم هەیە!!
Inga kommentarer:
Skicka en kommentar