هەموو ڕۆژێ سیویەکی ئابە

من ٣١ی ئابم بە قورسی نەگرتووە و تا ڕادەیەک، بە لامەوە ئاساییە. پێم وایە، ئەوەی هەیە، هەر بۆ ئەو بابەتە کارانە هەیە، جا چ پارتی بێ یا یەکێتی یا حیزبە ئیسلامییەکان، تا دەگاتە عەلی قەرەداخی. حیزبەکانمان، بەر لە ٣١ی ئابی ١٩٩٦ هەمیشە خەریکی پلاندانان بوونە بۆ کاری لەو بابەتە. لە بیرتان نییە؟ تاڵانکردنی کوردستان و ئاودیوکردنی هەرچی یەک فلسی دەکرد، چییان لە ٣١ی ئاب کەمتر بوو؟ کە بە کۆمەڵ بە هانای سەددامەوە چوون، چی لە ٣١ی ئاب کەمتر بوو؟! گفتوگۆی ناوەختی حیزبەکانمان لەگەڵ سەددامدا، لە ٣١ی ئاب کەمتر بوو؟ پەنادانی ئەنفالچی یا دەربازکردنیان، چی لە ٣١ی ئاب کەمترە؟

ئەمڕۆش، کە ٣١ ئابە، ٣١ی ئاب دووپات دەبێتەوە. هیچ بەرگرییەکم نییە لە وشیار زێباری، وەزیری دارایی عیراقی بکەم، بەڵام کە کورد لە بەغدا پشتی یەکتر بەربدەن، ٣١ی ئابێکی ترە. من، جگە لە پشتبەردان، چاوەڕوانی هیچی ترم لێیان نییە، بەڵام ئەوە ٣١ی ئابێکی ترە.

با پارتی بە لایەوە سەیر نەبێ لە پەرلەمانی عیراقدا، لایەنەکانی تر پشتیان بەردا. ئیدی دەرفەتە و بۆیان ڕەخساوە... ئاوها دەستی خۆیان وەشاند، وەک پارتی لە چەندین ٣١ی ئابدا دەستی خۆی وەشاندووە. شتێ لای ئەو حیزبانە نییە پێی بڵێن کورد. لای ئەوان حیزب و سەرکردە هەن... بەرژەوەندی حیزبی و کورسی و ملیاردە دۆلار هەن! ئێمە، تەنها لە لێقەومان و برسیبوون و کۆڕەو و جەنگدا بەشدار دەبین. ئەگەر بەتەمای شتی تر بین، نەفامین.

ئەگەر هەموو لایەنەکان، "بەر لەوەی هەر شتێ بن کورد بن"، هەموو کێشەکان بنەبڕ دەبن. بەڵام ئەوە دروشمی مەردانە!! دروشمی دوانزە سوارەی مەریوانە، نەک تاڵانچی و ئاودیوکەر!

کێشەی گەورەی ٣١ی ئاب ئەوەیە کە پارتی بە تەنها کردی. دەیان ٣١ی ئاب، کە پارتی و یەکێتی و حیزبەکانی تر پێکەوە ئەنجامیان داوە، بابەتی باس نین و کاتێ بۆ نەتەوەکەمان هەموو ئەو ٣١ی ئابانە دەبنە بابەتی باس، دەبێ فاتیحا بۆ دەسەڵاتی خۆیان بخوێنن. جا کامە لایەنیان ئەوەی دەوێ؟!