خەم

خەمی ئەو بۆ من و خەمی خۆشم هەر بۆ خۆم

ئەو ناونیشانەی سەرەوە دەکاتە ئەوەی کە من باری خۆم بە کۆڵمەوەیە و باری ئەویش لە خۆم بار دەکەم. بەڵام من، ئەگەر خێر بە ناوچەوانمەوە بوایە جارێ باری خۆمم دەگەیاند، هیچ نەبێ بۆ ئەوەی بە بێ بار، فریای بارەکەی ئەوانیش بکەوم!!... بارێکی میسری ئەوەندە قورس، دەوڵەتێک کە ڕەگی دەگاتەوە سەر فیرعەونەکان، پێی بار ناکرێ، دەخەمە سەر پشتی خۆم! خۆ من، لە بەرەبابەوە لە چارەم نووسراوە باربەر بم!! بەڵام لە کاتێکی وەک ئێستادا، لە ئاستی تاکەکەسی و جاوەجاو بەولاوە چیمان بۆ میسر پێ دەکرێ کە خۆمان کلکمان بە تەڵەی ماددەی ١٤٠ و دەسەڵاتێکەوە بووە، ئەوەی لە بیری نەبێ چارەنووسی نەحسمانە؟!

من دەزانم ئەوەی لە میسر ڕوودەدا کارەساتە. ناهەقییەکە و ملی خەڵکی میسری گرتووە. منیش دەزانم زۆرینەی خەڵکی میسر دەنگیان بە ئیخوانییەکان داوە و عەسکەری میسری بە ئینقیلابێک، ئیتر بە ویستی ئەمەریکا بووبێ یا ئیسرائیل یا هەر شەیتانێکی تر، پرۆسەی دیموکراتییان تێکدا و ودۆخی میسریان وەها شێواندووە کەس ناتوانێ پێشبینی ئەنجامەکانی بکا. بەڵام ئەو ڕووداوانەی میسر، خەوتن و نانخواردن و قاوەی بەیانیان و جگەرەکێشان، نە بە تۆ تەرک دەکەن نە بە من. خەمەکانی خۆشم لەبیر نابەنەوە... واتە خەم هەر بە کۆڵی خۆمەوەیە و ئەگەر لە ڕۆژاوای کوردستان بوومەلەرزەش ڕوو بدات و ژێروژوور بین، میسرییەکان لە بەر خاتری کورد دەستبەرداری کێشەی خۆیان نابن و ناپەرژێنە سەر ئەوەی بە هاوارمانەوە بێن. ئەو ڕووداوانەی میسر، ئەو شەڕەشم بیر نابەنەوە کە دژی میللەتەکەم، بە ناوی ئیسلامەوە بەرپا کراوە و هەر دەڵێی تازە قەعقاع دەستی داوەتە شمشێر و بۆ سەپاندنی ئیسلام بە سەر کورددا بە (اسلم تسلم)ەوە هاتووە و هەتا ئێستا کورد، نە بۆتە موسوڵمان و نە ڕۆژێ لە ڕۆژان شەرەفی عارەبی لە قودس کڕیوەتەوە و نە یەکەم بینای گوندەکانمان مزکەوتە! ئەو موجاهیدانە، فەلەستینیان ڕزگار کرد و جوویان فڕە دایە دەریاوە و چۆکیان بە ئەمەریکا دادا و دیسان لە تەنگەی تاریقی کوڕی زیاد بەرەو ئەوروپا پەڕینەوە و کێشەی نێوان ڕافزی و سوننە عەلاج کرا... هیچ نەماوە ئەوە نەبێ کورد ببێتە موسوڵمان! من نازانم موسوڵمان بوون چۆنە و چۆن کورد، کە خۆی موسوڵمانە، ببێتەوە بە موسوڵمان!! تۆ بڵێی وەک ژن مارەبەجەحەش دەکرێ، ئاین بە جەحەشیش بە کورد نەکرێ؟!

ئەی خوایە میللەتی بێ دەوڵەت چەند ناشرینە و چەند سووکە! جووەکان، هەتا دەوڵەتیان نەبوو، لە ئەوروپا، لەگەڵ مشکدا وەک سەرچاوەی تاعوون تەماشا دەکران و بۆ نەهێشتنی تاعوونیش، دەبوو جوولەکە و مشک قڕ بکرێن! قەرەجەکانی ئەوروپا، زەرەریان بۆ کەس نەبوو کەچی نازییەکان کەوتنە قڕکردنیان و ئێستاش ڕوو لە هەر بازاڕێک دەکەن، چەندین جووتە چاو چاودێرییان دەکەن نەک شتێک بدزن! قەرەجاکان هەتا ئێستاش وەک خۆیان ماونەتەوە، بەڵام جووەکان کە بوون بە خاوەنی دەوڵەتی خۆیان، ڕێزی خۆیان بەدەست هێنایەوە و خۆیان چارەسەری زۆر پەتا بۆ سەرجەمی بەشەرییەت دەدۆزنەوە و بڕیاریش دەدەن ئەم جیهانە چۆن هەڵسوڕێ و لە میسر کێ دەسەڵاتی هەبێ! ئێمەی کوردیش وەک قەرەجەکانی ئەوروپا و وەک جووەکانی سەدە ناوینەکان، بە سەر ئەم گۆی زەمینەوە بەڵاین! من باوەڕی تەواوم هەیە ئەگەر کوردێک، ببێتە سەرۆکی ڕیکخراوە ئیسلامییەکانی هەموو دنیاش، وەک چۆن کەریم خانی زەند خۆی پێ بچووک بوو و ناوی پاشای لە خۆی نەنا، ئەویش ئاوها خۆی پێ سووک دەبێ و ناوی سەرۆک لە خۆی نانێ! کە تۆ کوردیت، چەقی ڕۆحت موالییە... موالییە بۆ عارەب و موسوڵمانان و بۆ کۆمۆنیزم و بۆ عەولەمە و زاناکانی دنیا... موالییە بۆ هەر شتێکی ناکورد. تۆی کورد بوونتت نییە ئیتر چی بۆ میسر دەکەیت؟! لوورەی گورگی سەر گردەکانی گەرمیان چەند قودس ڕزگار دەکا و چەند کێشەی میسر چارەسەر دەکا، لوورەی کوردیش، جا موسوڵمان بێ یا چینچی یا فەیلەسووف، هەر ئەوەندە!! من بڕیارم داوە بۆ میللەتی خۆم نەبێ، بۆ هیچ کەسێ نالوورێنم، بە تایبەتی کە دیتم ئەنفال کراین و لە بیابانەوە یەک لوورە چییە نەمانبیست! حەفتا ساڵیش بۆ دەوڵەتی سەیر و سەمەرەی دنیا، کە کەس نەیدەزانی لە کوێی نەخسيکانن، بە بێ هوودە لووراندمان و ئەوەی بۆمان مایەوە، تەراویلکەی بوونی خۆمان بوو و هیچی دی. من نازانم جیاوازی نێوان ئەو کوردە موسوڵمانەی کە ئێستا ڕۆژاوای کوردستانی لەبیر نییە و ماددەی ١٤٠ نایبزوێنێ و شیوەن بۆ میسر دەگێڕێ، چ جیاوازییەکی لەگەڵ ئەو کۆمۆنستە کوردەدا هەیە کە خۆی لە بۆردومانی فڕۆکەی سۆڤیەتی دەشاردەوە و بۆ لایەنگری لە ڤێتنام و لە دژی ئەمەریکا ئیمزای کۆ دەکردەوە! هەر حۆرییەکان؟!

خوا ڕاستی فەرمووە: "إن اللە لايغير ما بقوم حتی يغيروا ما بانفسهم" ئایە هەرە هەرە دیندارە موسوڵمانە تۆخەکانمان ڕەچاوی ئەو ئایەتەیان کردووە؟! نا وەڵڵا... ناوەڵڵا... 

رد علی مقال

إن كانت هذە هي الثورة فتبا لها

حكيم كاكەوەيس

كتب الاخ مهند الكاطع مقالا في الحوار المتمدن اسماە "ارهاصات الخطاب الكوردي في ظل الثورة السورية... وجهة نظر عربية ) حاول فيە ان يكون منصفا بين الفئات وجامعا للشمل ومجردا – في ظاهر الامر علی اقل التقدير - من الانتماءات في الصراعات الدائرة علی الساحة السورية. لكنە بدأ بكلمة تشمل الكثير من المعاني حيث كما للكاتب حق تفسيرها والتحجج بها، كذالك للقارئ حق تأويلها وترجيح معانيها وهي كلمة "ارهاصات" حيث تعني كما افهمها التعثر في الكلام وتعثر الدواب في السير وتعني كذلك الصوت الكتوم ، وتعني الاصرار علی الذنوب وليس واضحا اي المعاني يقصدە الكاتب، ولكنها لا تبشر بخير علی كل حال، فأبرئە لعدم يقيني بقصدە.

وبدأ الاخ الكاتب مقالە بالجملة التالية : "خلق اللە الناس شعوبا وقبائل ليتعارفوا" . والاستشهاد بهذە الحكة الإلهية فيە الكثير من العبر إن كانت النيات صافيات لكن العقود الماضية من اعمارنا، ودعنا عن اجدادنا و التأريخ بطولە وعرض احداثە، علمتنا ان نتجنب الجميل من الكلام إن لم يكن في محلە الطبيعي عند المقدرة... كان احری بالاخ الكاتب أن يتذكر هذە الحكمة الإلاهية و ينسلها كالسيف عندما اسكن النظام السوري العرب واستوطنهم علی الاراضي الكردية، تماما كما اسكن الاسرائيليون اليهود علی الاراضي الفلسطينية،  فكانت الحالة الاولی نضالا قوميا والثانية اعتداء علی الانسانية و حقوق الانسان!. كان أولی بە ان يتذكرها وينسلها بوجە العنصريين البعثيين عندما شكل النظام السوري الحزام القومي العربي حول الكرد علی ارضهم وكاد ان يخنقهم، ثم جردهم من جنسيتهم و حرمهم من الاعمال الرسمية. كان اولی بە أن يتذكرها  عندما اتهم الكاتب القاص، زكريا تامر السوري، الكرد بالخونة واتذكر كم كنت مولعا بقصصە حتی ترجمت احداها الی الكردية وليتني لم افعل! و لنا تساٶلات حول هدە الحكمة الإلاهية و تطبيقها وانتهاجها... هل من الممكن ان تكون منادات المجاهدين من النصرة من  علی منابر المساجد الی قتل الاكراد ونهب اموالهم واستحياء نسائهم انتهاجا لهذە الحكمة الالهية؟ مناداة المسلمين للجهاد ضد الكرد لا تدل علی تلك الحكمة و خاصة في النداء تبشير للجنە بعد فتك الاعراض ونهب الاموال و ذبح الرجال. تبشير القتلة بالجنة يجعلهم قاب قوسين او ادنی الی ان يكونوا "تحت الشجرة" كي يكونوا من اتباع الرسول الاوائل! ما هذا الدجل؟! اليس هذا تسخير الاسلام للاغراض القومية الشوفينية  و الكل يعلم بأن اللە ما انزل القرآن بلغة العرب إلا ليعقلوا بعد عبادة الاصنام وما عبدناها قط، وما فسروها ولا تلاعبوا بكلماتها إلا نفاقا واعجابا فارغا بالذات. فالسكوت عن هذە الخزعبلات  يفرغ الايمان باللە من فحواە.

ما تذكرتم هذە الحكمة الإلهية ولا فكرتم بتطبيقها إلا عندما بدأ الكرد يدافعون عن عرضهم وارضهم وتستزيدون عليهم ذلك وتريدونهم موالين كما كانوا في عهود الامويين وصدر الاسلام، رغم إنتمائهم اليە، لتأمين حاجات الجيوش المادية والغذائية والجنسية. قد لا ازيدكم علما عندما اقول: كل الاقوام في المنطقة، عربا كانوا ام تركا ام فرسا، استغلوا الاسلام لمصالحهم القومية إلا الكرد لقد ضحوا، ولا يزالون يضحون بمصالحهم القومية من اجل الاسلام تماشيا مع تلك الحكمة حيث يٶمنون بها من الصميم لا عند الحاجة فقط.

اتقوا اللە يا ناس! الم تكف الانفال والابادة الجماعية؟ ألا تعتقدون بأن الدنیا يومان، يوم لكم و يوم عليكم؟! منذ سقوط الامبراطورية العثمانية، تستغل العرب كل من هب و دب ولا حول للعرب إلا استغلال الكرد فما قصرت في هذا الاستغلال لحظة وكل استنكار من الكرد تسبب تدفق الاتهامات عليها: عملاء اسرائيل و امريكا والشياطين! وما تشبثت الكرد إلا بالقش في احسن الاحوال!

إن كانت الثورة السورية تستهدف ابدال الظلم بالظلم فتبا لها و مرحی بعودة البعثيين... البعثيون احتلوا ارض الكرد وحرموا عليهم المواطنة والعمل وقتلوا شباب الكرد وحرقوا دار السينما بمن فيە و قتلوا الشيخ معشوق الخزنوي، ولكن ما استباحوا عرضهم جهرا...

http://www.ahewar.org/debat/show.art.asp?aid=368685

کردنەوەی کۆدەکانی کورد

وردە وردە، وا خەریکە کۆدی ژێردەستەیی و بێئیرادەیی کورد بۆ هەموو لایەکمان دەکرێتەوە،. خەریکە مەتەڵی ئەو جادووە نەفرەتییەی کە لە کورد کراوە، بە تەواوەتی ئاشکرا دەبێ. هۆکاری ژێردەستەیی کورد جگە لە خۆبەکەمزانین بەرانبەر داگیرکەران هیچی تر نییە و کلیلی ئەوەش لە ڕۆژاوای کوردستان کەوتە دەستی ئەو کوڕ و کچە قارەمانانەوە کە خۆیان بە کەم نازانن و بەرگری لە کەرامەتی نەتەوەیی و نیشتیمانیمان دەکەن.

بەرەی نەسرەی عارەب و دەوڵەتی ئیسلامی عیراق و شام، وەک ئەو سەردەمانەی هێشتا کورد ئاشنای ئیسلام نەبوو، فەتوای کوردکوژی و تاڵانکردنی کوردیان لە مزگەوتەکانەوە بڵاو کردۆتەوە و تەنانەت، بە پێی هەندێ لە ڕاگەیاندنەکان، ژنی کوردیشیان بۆ خۆیان حەڵاڵ کردووە و بەهەشتیش مسۆگەر و سەربار! دیسان هەمەجەکان دانیان لە ژنی کورد تیژ کردووە و لە لایەن خۆیانەوە، مەسەلەکەیان کردووە بە مان و نەمان! دیسان ئەمەوییەکان، ئەم جارە بە بێ عومەری کوڕی عەبدولعەزیز، گەڕانەوە بۆ تاڵانکردن و سەربڕین و دەستدرێژی کردن و سەراری و جاریە!

من لەوە دەگەم کە ئەوانە دەیانەوێ ڕەوایەتی بەو تاوانانەی خۆیان بدەن و ئیسلامیش وەک چەکەکانی تریان بکەنە کەرەسەیەک بۆ ئەو سەرکەوتنەی نیازیانە لە دژی کورد بە دەستی بێنن، پێویستە هەموو کورد بزانن کە ئەوانە لە سەرەتای هاتنیانەوە بۆ سەر خاکی کورد، ئیسلامیان کردۆتە سەنگەر و لەوێوە، چی خوا پێی ناخۆش بێ دژی کورد کردوویانە و دەیکەن! بەڵام جگە لە بچووکی و پەراوێزی پیاوانی ئاینی کورد و حیزبە ئیسلامییەکانی کوردستان، چ هۆکارێک بۆ بێدەنگییان هەیە؟! ئەی مەلای کورد بەرانبەر ئەو فەتوایانە چ هەڵوێستێکیان هەیە؟! سەڵاوات لێدەدەن و بە دەنگی ئەوانەوە دەچن یا بەرگری لە میللەتەکەی خۆیان و نیشتیمانی خۆیان دەکەن؟

کورد گوتەنی، مشت لە درەوشە دەگەڕێتەوە و چەکی فەتوای ئەو تاڵانچییانەش، ئەگەر هەڵوێست و فەتوای پێچەوانە نەبێ، لە هەڵوێستی قارەمانانەی کچ و کوڕی ڕۆژاوا دەگەڕێتەوە... مەلای کورد و حیزبی ئیسلامی کورد، ئازان بۆ فەتوادان لە دژی پەشێو و شێرکۆ بێکەس و هەندێ لە نووسەران، بەڵام لە ئاستی دەستدرێژیکردنی عارەب بۆ سەر خاک و شەرەفی کورد، قوڕگی فەتوایان نووساوە!!

ئەوە کۆدی نهێنی ژێردەستەییمانە و ئەگەر مەلاکان و حیزبە ئیسلامییەکان ئاوها بەرانبەر ئەو کارەساتانە کڕ و بێدەنگ و بێهەڵوێست بن و نەتوانن ئاینی ئیسلام بەکەنە چەکی بەرگریکردن بەرانبەر دەستدرێژکەران، هیوادارم سەرجەمی گەنجانی کورد ببن بە هەڵگەڕاوە، نەک ئەو جۆرە موسوڵمانانەی بۆ داگیرکەر ملیان شۆڕ بکەن! ئیسلام لە کورد نەبێ لە کێ بۆتە کەرەسەی دیلێتی و ملشۆڕکردن بەرانبەر بەو هەمەجانەی بزوێنەریان مەسەلەی جنسییە لە هەردوو دنیا؟! ،من ئیسلامم بۆ چییە ئەگەر پەنایەکی بۆ پاراستنی ژن و کچی کورد تێدا نەبێ؟ ئایەت و حەدیس چ بە کەڵکی من دێن ئەگەر ببینم بە زەبری ئایەت و حەدیس بایی ئەوە کەرامەتمان پێوە نەماوە بەرگری تەنانەت لە مزگەوتەکانیش بکەین؟! ئیسلام، ئەگەر ئاینی کرانەوە و ئاشتی و مرۆڤایەتی بێ، مەلاکانمان لییان کردین بە ئاینی زەلیلبوون و ژێردەستەیی و ١٤٠٠ ساڵە بۆ بچووکی و کۆیلایەتی کەویمان دەکەن و ڕاماندێنن! هەر دە کەسی تاڵانچی و دەستدرێژکەری دڕندەی بیابان دوای نیمچە خوێندەوارێک دەکەون و بە دەم (حێ علی الجهاد)ەوە پەلاماری سەر و ماڵ و خاک و ژن و منداڵمان دەدەن و مەلاکانی ئێمەش نەک دە، بگرە دەیان کەس لە خۆیان گرد دەکەنەوە و باسی چۆنیەتی تەیەمومیان بۆ دەکەن و هێرشی ئەو دڕندانەیان بیر دەبەنەوە و هەندێ جار لەوەش خراپتر، هانیان دەدەن شانبەشانی ئەو هەمەجانە و دژی میللەتی خۆیان غەزا بکەن!

هەزار و چوارسەد ساڵە ئاوها ژیاوین؟! ئەوان فەتوای ڕووتکردنەوەمان دەدەن و پیاوانی ئاینی ئێمەش فەتوای کوشتنی هەرزەکارێکی کورد دەدەن چاوی لە کچێک داگرتبێ! گوناهی دەستدرێژیکردنی ئەوان بۆ سەر ژنی کورد، بە قەدەر چاوداگرتنێکی هەرزەکارێکی کورد ناشەرعی نییە؟!

گەنجی کورد وەها لە خشتە براوە، لە هەڵەبجە و سلێمانییەوە بچی بۆ سووریا و لە ڕێی خوادا، دژی میللەتی خۆی شەڕ بکا بەڵام حیزبەکانمان ئەوەندە هەستی نەتەوایەتییان نییە ڕێ بە دوو گەنجی کورد بدەن لە باشوورەوە بچن دژی دوژمنانی کورد لە ڕۆژاوای کوردستان بجەنگن!! لە بیرتان چووەوە کوڕی کوردی ڕۆژاوا لە شۆڕشی ئەیلوولدا چۆن بەشدارییان دەکرد؟!

لە سەردەمی سەددامدا ئەو بابەتە مەلایانە تیایاندا هەبوو دژی میللەتی خۆی فەتوای دەدا! ئەگەر ئەوسا ترسی دڕندەیی بەعس کەتنی پێ دەکردن، ئەی ئێستا چی وا دەکا بەرانبەر دڕندەیی ئەو جیهادیانەی عارەبی سووریا بێدەنگ بن! تۆ بڵێی سەرشۆڕکردن ببێتە هۆکاری لێبوردنی خوا لە بەندەکانی؟! تۆ بڵێی بەرگرینەکردن لە خاک و ژن و ماڵ و منداڵ، چەند پلە بەرەو پێغەمبەرایەتی بەرزمان بکاتەوە!! خۆزگە بەم تەمەنەوە بمتوانیبا بگەمە لای ئەو کوڕ و کچە کوردانەی ڕۆژاوا کە بەرگری لە کەرامەت و کوردبوونمان دەکەن، تا هیچ نەبێ لە کاتی پشوودانیاندا پێڵاوەکانیان بتەکێنم!

ئەوەیە نهێنی ژێردەستەیی کورد و ئیتر با کەس یەخەی ئەم و ئەو نەگرێ و لە فەلسەفەی گریکەوە دەرمانی حازربەدەستی بۆ نەخوازێتەوە و لاپەڕەی مێژووی یەئجووج و مەئجووج هەڵنەداتەوە و ئەوەتا کلیل و نهێنییەکان لە بەر دەستماندان و هەر ڕێبازێکی فکری و فەلسەفی بگرینە بەر، لە ئەنجامدا زاتی ئەوەمان نییە خۆمان وەک میللەتێکی سەربەخۆ بخەینە ڕوو! هۆکاریش، مەلاکانمانن و کەسی تر و هیچی تر نا!

چەکدارەکانی قاعیدە، تەنانەت ئەو کوردەشیان سەربڕیوە کە دیلێکی خۆیانی بۆ بردوونەتەوە.. ئەمە ڕەوشتی کام دڕندەی دنیایە، مەلا؟! مامۆستا مەسعوود محەمەد شتێکی لەم بابەتەی فەرمووە: "هەر کەسێ کەوتە بەر کوتەکی کورد، ئەوا بە پیی خۆی بۆ بەر کوتەکەکەی هاتووە و توانای کورد ئەوەندە نییە دەستدرێژی بکاتە سەر کەس!" و ئەوە یەکەم جارە دەست و پێی کوڕ و کچی کورد بە زنجیری فەتوای شۆڤیەنییەکان شەتەک نادرێ و ئەوان چەند فەتوا دەدەن، ئەمان لە بەرگریکردن سوورتر دەبن... دەی مامۆستایانی ئاینی و حیزبە ئیسلامییەکان و گەنجە بەرگریکەرەکان لە مورسی، دوعا بکەن تا خوا هیدایەتی کوردی ڕۆژاواش بدا و کچ و ژنەکانیان تەسلێم بکەن!! دەی بەڕێزان بە باسی ئەو غەدرەی لە مورسی کراوە، هەموو ئەو غەدرانە داپۆشن کە لە کورد دەکرێ!!

http://nnsroj.com/detiles.aspx?id=5341&ID_map=23

http://www.penusakan.com/hewal/15932-2013-07-22-20-33-52.html

http://so.firatnews.com/news/roejnae/lnsr-y-h-wh-y-khwrd-bkhwjy-jny-khwrdy-py-hh-llh-w-dh-shchyth-bh-hh-shth-wh.htm

http://xendan.org/dreja.aspx?=hewal&jmara=63620&Jor=1#.Ue1RA0lS8fM.facebook

هێلکەباران!

دیموکراتخوازەکان! بەرپرس هێلکەباران دەکرێ، نەک هاوڵاتی!

هەر ئەوە ماوە خەڵکی کوردستان، کاتێ سەرودڵیان دەگیرێ، یا دەستێ دۆمینە دەدۆڕێنن، یەکتر بدەنە بەر هێلکە و تەماتە! ئەمە بە حیساب، ئازادییە! کە تۆ سنووری خەڵکی ترت بەزاند، واتە سنووری خۆت نەزانیوە! کاتێکیش سنووری خۆتت نەزانێ، نە شایستەی ئازادیت، نە هێشتا بۆ ئەوە ئامادایت ئازاد بیت! کە ئامادەی ئازادبوونیش نەبووی، چۆن ئازادی بۆ میللەتێک فەراهم دەکەیت؟ من پێم وایە مافی هەڵبژاردن و پەسەندکردنی کەسیشت نامێنێ بۆ ئەوەی بیکەیت بە دەسەڵات بە سەر خەڵکانی غەیری خۆتەوە! بە کورتییەکەی، تۆ مرۆڤێکی لە چاخی بەردەوە هاتوویت و بە پێوانەی ئەم سەردەمە نیوەبەشەریت!

لە حاڵەتی بوون بە مرۆڤی چاخی بەرد، دەرمانی ئەو خەڵکە دەزگای پۆلیسی و ئەو کوتەکەیە کە خۆی شارەزایەتی، نەک دیموکراتی. میللەتێک نەزانێ پەیڕەوی ئازادی بکا، واتە شایستەی ئازادی نییە و ئیتر خاکی داگیر بکرێ یا کەرامەتی، بە لایەوە جێگەی باس نییە! ئەوەتا ئێستا نیوەی باشووری کوردستان داگیر کراوە و بە دەگمەن نەبێ لای کەس باس نییە! تەنانەت خەڵکی ناوچە داگیرکراوەکانیش، ڕاهاتوون و بە لایانەوە گرنگ نییە! خەڵکانێک هەست بەو برینە قووڵە نەکەن، چۆن یەکتر هێلکەباران ناکەن؟!

سەگ و گورگ، بۆ دیاریکردنی سنووری خۆیان، بە دار و بەردی ناوچەی خۆیاندا دەمیزن: ئەمە ناوچەی منە ها! دەبوو ئێمەش، کە تا ئێستا هیچ مەزەبێکیی بەشەری چارەی نەکردووین، لە سەر مەزەبی سەگ و گورگ، سنووری خۆمان دەستنیشان بکەین و بە حەمریندا بمیزین! کەچی ناوەندی پایتەختی هەرێمۆکەکەمان، بە هێلکە نیشان دەکەین: ئەمە سنوورەکەمانە!!

لە ناوەندی هەولێر، کەمالی سەید قادر هێلکەباران کرا. ئەو مرۆڤە کوردە، هاونیشتمانێکی ئاساییە و بە قەدەر خۆی لە دەسەڵات ڕازییە یا ناڕازییە. وڵاتییەکی کوردستان مافی ئەوەی نییە ناڕازی بێ؟! بەو هاوینە گەرمەش ناڕازیبوون جائیز نییە؟

ئەوەندەی شوێنی ڕووداوەکە سەرنجڕاکێشە، ڕووداوەکە بەخۆی سەرنجڕاکێش نییە. ئەو خەڵکە، وەک کەسێکی یەکێ لە ڕۆمانەکان (پێم وابێ هی کافکایە) لە گەرما بێزارە و خەڵک دەکوژێ. بەڵام هەولێر کە بە گەرما و سەرما و بە بەر چاوی بەعسەوە پەنای لێقەوماوان بوو، چۆن ئەوەی تێدا ڕوو بدا؟! ئەوە هەمان هەولێرە یا تووشی بەدگۆڕان بووە؟!

بەڵێ لە وڵاتە دیموکراتییەکاندا، ڕەفتاری وا دەکرێ، بەڵام نەک بەرانبەر هاونیشتیمانێکی ئاسایی شارێک و نەک بەو چڕی و دڕندەییەش خەڵتانی خوێن بکرێ! بەڵێ، ڕێی تێ دەچێ بەرانبەر بە وەزیری کارەبا، لە کاتی نەبوونی کارەبادا بکرێ. دەشێ بەرانبەر وەزیری کار و کاروباری کۆمەڵایەتی، لە حاڵەتی نەبوونی کاردا بکرێ! دەشێ بەرانبەر بە وەزیری تەندروستی، لە کاتی کوێرکردنی کۆمەڵێ نەخۆشدا بکرێ!.. بەڵام یەک دوو هێلکەی بەر دەکەوێ یا ناکەوێ! کەچی لە وڵاتی ئێمەدا هاوڵاتییەکی ئاسایی هێلکەباران دەکرێ نەک بەرپرسی کارەسات! ئەگەر کەمالی سەید قادر ئۆتۆمبیلی جامڕەش و حیمایەی چاوسووری لەگەڵدا بوایەن، وایان لێی دەکرد؟! عارەبەکانی بەغدا پێڵاویان لە جۆرج بووش گرت، لە هەولێریش کەمالی سەید قادر هێلکەباران دەکرێ! ئەوان گەمەیەکی قورسیان کرد و ئێمە گەمەیەکی سووک! مرۆڤ لە وڵاتی ئێمەدا چەند بێبەهایە!

چییە؟! کەمالی سەید قادر کارەبای لە خەڵک بڕی؟! کەمالی سەید قادر ماددەی ١٤٠ی ئیمزا کرد؟ خۆ دەکرا هەر ئەو کەمالی سەید قادرە ببێ بە پارێزگاری شارێک یا وەزیرێکی هەرێمی کوردستان و لە بری ئەو، کەسێکی تر هێلکەباران بکرابا. بەڵام کوڕە کەچەڵە بوو بە والی و کەمالی سەید قادر هێلکەباران کرا... هەر کەسە و خۆی و بەختی!

ئەوەی لەو نیشتیمانەی ئێمەدا دەگوزەرێ مەترسیدارە. بەرەو ئەوە دەچێ هەموو ڕیسی کورد بکاتەوە بە خوری. ئەو خەڵکەی بێ ئینسافانە کەمالی سەید قادر هێلکەباران دەکەن، بە لایانەوە گرنگ نییە کێ هێلکەباران دەکەن. ئەمڕۆ کەمال و سبەینێ ئەو کەسەی فەرمانی هێلکەبارانی دەرکرد!

جاران هەولێر، لە سەر زاری پەشێوەوە بە داگیرکەرانی دەگوت: "بارکەن بڕۆن!" ئەمڕۆ ڕۆڵەی خۆی هێلکەباران دەکا تا شاربەدەر بێ!

پێمان وابوو بە هۆی دڕندەیی داگیرکەرانەوە بوونی کورد لە مەترسیدایە، بەڵام ئەوەی ئێستا مەترسییە، لە لایەکەوە بە کۆمپانیابوونی حیزب و دەسەڵاتە و لە لایەکی ترەوە بێبەهابوونی تاکی کوردە وەک مرۆڤ! هەر دەسەڵات نا، خەڵکەکەش مرۆڤیان لا هیچە کە بە سەر یەکەیەکەی خۆشیاندا دەشکێتەوە و پڕە لە سووکایەتیکردن بە خۆیان، وەک مرۆڤ!

هەر باشە، ئەم ڕووداوەش تا ماوەیەک مەسەلەی هەڵبژاردنی پەرلەمان و گەڕانەوە و نەگەڕانەوەی دەستوور بۆ پەرلەمان و هەڵبژاردنی سەرۆکی هەرێم بۆ ماوەیەک لە بیری خەڵک دەباتەوە و هەر پیلانێکیش لە ڕۆژاوای کوردستان بکرێ، دەخرێتە بن پەردەوی هێلکەبارانەوە!!

بە هێزی بڕنەو لەشان... ڕزگاری بوو کوردستان!!

دەردە مانگا

دەردە مانگا و پەتای سیاسەتمەداری کورد

جاروبارێ، سروشت برووسکەیەک بۆ پیرەدارستان دەنێرێ و تەڕ و وشکی دەسووتێنێ. دارستانەکە، سەرلەنوێ هەڵدەداتەوە و وەک بووک خۆی دەنوێنێ! گەش و جوان و تەندروست، هەموو پیرەدارە سووتاوەکان دەبنە پەین و پێخۆری نەمامە تەڕ و تازەکان.

جاروبارێ، دەردە مریشک ڕوو لە وڵاتێک دەکا و هەرچی مریشکی لاواز هەیە ڕایدەماڵێ. ئەوەی لەو دەردە دەرباز دەبێ، بەرگەی برسێتی و ناخۆشی و هەموو نەخۆشییەک دەگرێ.

جاروبارێ دەردە مەڕ دێت... لەرەزک یا گێژکە. قڕیان دەکا. ئەوەی دەمێنێتەوە، بەرگەی نەخۆشی و سەرما و گەرما و ئەسپێ و برسێتی دەگرێ.

جاروبار دەردە مانگا دێ و قۆڕەبڕیان دەکا. بەڵام ئەوەی لەو پەتایە دەرباز دەبێ، ڕەچەڵەکێکی بەهێز پێکدێنێ و بەرگەی زۆر نەخۆشی دەگرێ.

هیتلەر وەک پەتایەک هات و ڕووی لە جوولەکە کرد. ملیۆنان جوولەکەی کوشت. ئەو جوولەکانەی مانەوە، ئەوەندە تەندروست بوون، دەوڵەتێکیان دروست کرد بەرگەی ڕەشەبا و ڕقی یەک ملیارد بەشەر دەگرێ و بە سەریاندا زالیشە! ئیسرائیلێکیان دروست کرد بڕیار دەدا کێ لە میسر دەسەڵاتی هەبێ! ئیسرائیل ڕێ نادا هیتلەرێکی تر دروست ببێ! جوولەکە بە هۆی پەتاوە هێزی بەرگرییان زیادی کرد.

دارستان دژی سووتان کوتراوە. مامر دژی دانکە و مەڕ دژی گێژبوون و مانگا دژی هاربوون و جوو دژی نازییەت. هەموویان بەرگرییان پەیدا کردووە و دەتوانن خۆیان ڕابگرن!

خوایە، دەردە بەرپرس و سیاسەتمەداری کورد هەر نەهات لە دژی نەخۆشی و خیانەت قایمیان کات و بەرگرییان زیاد بکا!!

بەڵێ دەرد لێی دان! بەڵێ تووشی پەتا هاتن! پەتای جاشێتییان گرت و هەر مانەوە! دەردە ئەنفال هیچی پێ نەکردن! دەردە کیمیاوی کاری تێ نەکردن! دەردە هەرەس و دەردە شەڕی ناوخۆ و پەتای دزی و خیانەت! ئەوەندە دەرداوین هیچ دردێک کاریان تێ ناکا و تەنانەت دەردە سەد و چلیش ڕایان ناچڵەکێنێ!

ئاخر چۆن دەردە مامر کاریگەری لە سەر مانگا نییە، ئاوهاش دەردە کورد کاریگەری لە سەر سیاسەتمەدار و بەرپرسانی کورد نییە! بەرپرسان و کورد دوو ڕەگەزی جیاوازن!! کورد هێلکە بکا، ئەوان دەڕیخێنن! کورد بسووتێ ئەوان گەش دەبن! کە ئەنفال دێ، ئەوان زۆرتر دەبن! بە کیمیابارانی کورد هار دەبن!

دەی خوایە دەردە بەرپرس بنێریت! ئەگەر ئەوەش ناکەیت خوایە، دەردە کورد بنێریت تا هێزی بەرگرییان هەبێ و بتوانن بەو بەرپرسانە بڵێن نا!!

بۆ بیرهێنانەوە:

کەرکووک یەک کوردیشی تێدا نەبێ، هەر کوردستانە!

هەر یەکەمان پێوانەیەکمان بۆ خەڵک هەیە: یەکێ خەتێکی کێشاوە و لایەکی چەوساوەیە و لایەکی چەوسێنەر... خۆی لەگەڵ چەوساوەکاندایە، بەڵام چەوساوەکان بە لای ئەوەوە، کورد وەک میللەتێک ناگرێتەوە، بەڵکو بەشێکی دەگرێتەوە. یەکێکی تر خەتێکی کێشاوە و لایەکی ئیماندارانە و لایەکی بێئیمان و خۆی لە چەقی ئیمانداراندا دەبینێ. ئەمەش کوردی، وەک میللەتێک، نەخستۆتە دیوی ئیماندارانەوە، بەو حیسابەی کوردیش بێئیمانی تێدایە. یەکێکی تر خەتێکی کێشاوە و لایەکی ژنە و لایەکی پیاو و کورد لە هەردوو دیوەکە هەن! ماوەیەکی ززۆر خۆت لە ناو خۆشیدا خەتی دەکێشا: ئەم دیو خەتە، حیزبەکەی من و ئەودیو، حیزبەکانی تر... ئەمدیو جەلالی وو ئەودیو مەلایی، ئەمدیو حکوومەت و ئەودیو خەڵک! ئەمدیو نەوت و ئەودیو هەموو شتێکی تر!

منیش وەک ئەو هەموو خەڵکە خەتێکم کێشاوە: دیوێکی کوردە و دیوێکی هەموو دنیا. هەموو دنیا، غەدرلێکراو و ژن و ئیماندار و بێئیمان و بۆرژوا و ئاغا و گورگ و مەڕی لێ هەن. دیوە کوردەکەش میللەتێکە، ٢٥ سەدەیە چارەنووسی بە دەستی خۆیەوە نەبووە و دەسەڵاتی ئەوەی نەبووە بڕیار بدا ئاخۆ زاڵم بێ یا مەزڵووم! بەو حاڵەوە، نە دەتوانیویەتی پشتگیری لە غەدرلێکراوەکان بکا، نە دەستی ژنان بگرێ نە هیچ کاریگەرییەکی لە سەر ڕەوتی مێژووی خۆی و دنیا هەبێ!

ڕەنگە لە هەندێ لێکدانەوە بە هەڵەدا چووبم و جاشی کورد یا هەندێ حیزب و ڕێکخراو، هی ئەوە نەبن بخرێنە دیوی کوردیی خەتەکەوە و ئەوان یەکەم بەربەست بن لە بەردەم قەراری چارەنووس و ڕەوتی بەلاڕێداچووی مێژووی کورددا. بەڵام ئەگەر کورد خاوەنی کیانی خۆی بوایە، جاش دروست دەبوو؟! حیزبی هاوکاری موخابەراتی ئەم دەوڵەت و ئەو دەوڵەت پێکدەهات؟ هیچ حیزبێک دەیتوانی لە حیزبێکی ڕزگاریخوازەوە ببێتە کۆمپانیایەکی زەبەلاحی نەوت؟

ئەو حیزبانەی کە قەرار بوو کورد لە ژێردەستەیی ڕزگار بکەن، خەڵکیان زۆ بوو و میللەتەکەیان ئەوپەڕێ قوربانییان بۆ دان، کەچی ڕۆژ لە دوای ڕۆژ بەرەو دواوە چوون و لە بڕیاردانی چارەنووسی مرۆڤانەی کورد دوور کەوتنەوە تا لە ئەنجامدا بوون بە چەند دەستەیەکی قومارباز، کە یاری لە سەر کەرامەتی میللیمان دەکەن!

ماوەیەکی زۆر، ملاملانێی کورد لە سەر ئەوە بوو ئاخۆ مەلا مستەفا دڵسۆز بوو یا نادڵسۆز! مەلا مستەفا بۆ خۆی ببوو بە خەتێک و کوردی کردبووە دوو دەستەی سەرەکییەوە و تا ئاستی یەکتر کوشتن دژی یەک بوون. ئێستا، کە ململانێی ئەمدیو و ئەویوی مەلا مستەفا بە هۆی پارە و دەسەڵات و نەوتەوە سارد بۆتەوە، پێویستە قسەیەکی لە سەر بکرێ! ئایە مەلا مستەفا کاری بۆ کورد دەکرد یا بۆ کۆمپانیا نەوتییەکانی دنیا؟!

من هیچ لە سەر ئەو بابەتە ناڵێم ئەوە نەبێ، داوا لە نەیارانی مەلا مستەفا و یارانی مەلا مستەفا دەکەم، ئەم ڕستەیەی مەلا مستەفا، لە شاشەی تەلەڤزیۆنەکانەوە بڵێنەوە... تەنها بیخوێننەوە و هیچی تر: "کەرکووک یەک کوردیشی تێدا نەبێ، هەر کوردستانە!"

یەکێتی نیشتیمانی کوردستان، کە ساڵەهای ساڵ شەڕی ناوی مەلا مستەفایان دەکرد، بەو حیسابەی لەو باشترن، با ئەو ڕستەیە بڵێنەوە... با تەنها بیخوێننەوە!

پارتی دیموکراتی کوردستانیش، کە کوڕی مەلا مستەفا سەرۆکێتی و شانازی بە مەلا مستەفا و ڕێبازەکەیەوە دەکا، با ئەو ڕستەیە بڵێتەوە! با سەرکی پارتی، لە دڵی خۆیدا بیڵێتەوە! دەتوانێ؟!

من ئەو ڕستەیە دەڵێمەوە... "کەرکووک یەک کوردیشی تێدا نەبێ، هەر کوردستانە!"

بە ڕاستی دەبوو پارتی ڕووی ئەوەیان نەبێ وێنەی مەلا مستەفا هەڵواسن و شانازی پێوە بکەن، چونکە "هەر کوردستانە"کەی ئەویان ڕووت کردەوە و خستیانە سەر مێزی قومار و گوتیان: بە دەنگدانە و ماددەی ١٤٠ بڕیاری لە سەر دەدا. ماددەی ١٤٠ بە قەدەر جاشایەتی هەموو مێژووی کورد خیانەت بوو، هەم لە کەرکووک، هەم لە کورد و هەم لە مەلا مستەفا و ڕێبازەکەی!! سەرانی کورد، بە چاک و خراپیانەوە، لە مەسەلەی کەرکووکدا خیانەتکارن!! ئەوەی خیانەتی لە کەرکووک نەکرد تەنها مەلا مستەفا بوو! دەی با پارتی ئاشکرای بکا کە ئەویش خیانەتی لە کەرکووک کردووە! با ئاشکرای بکا کە ڕێبازەکەی مەلا مستەفا کەرکووکی نەگرتۆتەوە!

ئیسرائیل دوای ١٩ ساڵ

ئیسرائیل دوای نۆزده‌ ساڵ له‌ دروستبوونی، سینا و جۆلانی داگیر کرد! ئه‌دی ئێمه‌؟!

له‌و ده‌مه‌دا که‌ ئیسرائیل وه‌ک ده‌وڵت دروست بوو، سه‌رانی جووله‌که‌، جگه‌ له‌ که‌ره‌سه‌ی به‌رگریکردن، ماوه‌ی چه‌ندین ساڵ هێنانی خۆراک و پۆشاک و که‌ره‌سه‌ی بژێویان بۆ ناو ئیسرائیل له‌ خۆیان قه‌ده‌غه‌ کرد. واته‌ خۆیان گه‌مارۆی پێداویستییان خسته‌ سه‌ر خۆیان. به‌و شێوه‌یه‌، ناچار بوون خۆیان پێداویستی و بژێوی خۆیان به‌رهه‌م بهێنن و کوڕان و کچانی جووله‌که‌، به‌ چه‌که‌وه‌، بۆ به‌رهه‌مهێنانی پێداویستی، شه‌ویان ده‌خسته‌ سه‌ر ڕۆژ تا وای لێ هات دوای ماوه‌یه‌کی که‌م، نه‌ک هه‌ر به‌شی خۆیان، بگره‌ بایی هه‌نارده‌کردنیش به‌رهه‌میان هه‌بوو و خاکی مردووی پشتگوێخراویشیان ژیانه‌وه‌. ئێستا ئیسرائیل یه‌کێکه‌ له‌و ده‌وڵه‌تانه‌ی زۆرترین که‌ره‌سه‌ ده‌نێرێته‌ ده‌ره‌وه‌ و که‌مترین که‌ره‌سه‌ش هاورده‌ ده‌کات و ته‌نانه‌ت فڕۆکه‌ی پێشکه‌وتووش به‌ تورکیای موسوڵمان، بۆ کوردکوشتن ده‌فرۆشێت.

له‌ شه‌ڕی عیراق و ئێراندا، نیوچه‌ گه‌مارۆیه‌ک خرایه‌ سه‌ر ئێران و بازاڕی جیهانیش به‌ ڕووی عیراقدا کرایه‌وه‌. ئێستا ده‌بینین که‌ره‌سه‌ی ئێران بازاڕی عیراقی داگیر کردووه‌ و ته‌نانه‌ت بڕیاری سیاسیش له‌ عیراقدا به‌ پرسوڕای ئێران نه‌بێ نادرێت. جگه‌ له‌وه‌ش، ئێستا ئێران بۆته‌ خاوه‌نی وزه‌ی ئه‌تۆمی و عیراقییه‌کانیش له‌ سه‌ر زه‌ریا نه‌وته‌که‌ی خۆیاندا ده‌رۆزه‌ و دزی ده‌که‌ن. کاتێکیش گه‌مارۆ خرایه‌ سه‌ر عیراقی ناسروشتی، زۆری نه‌مابوو دانیشتوانی عیراق و کوردستان یه‌کتر بخۆن.

نۆزده‌ ساڵه‌ به‌ ناوه‌ چاره‌نووسمان به‌ ده‌ستی خۆمانه‌وه‌یه‌ و هیچ نه‌بێ ده‌توانین یه‌کتری بکوژین و یه‌کتر تیرۆر بکه‌ین، که‌چی هه‌موو دڵخۆشییه‌کانمان ئه‌وه‌یه‌ به‌رپرسانمان کۆشک و ته‌لاریان هه‌یه‌ و په‌رله‌مانتێره‌کانمان چل و چه‌ند ملیۆنێک دینار ده‌ده‌نه‌ ئۆتۆمبیل و خوا نه‌یبڕێ، به‌رزه‌پردیشمان هه‌ن!

ئیسرائیل له‌ یادی نۆزده‌ ساڵه‌ی دامه‌زراندنیدا ئه‌و سه‌رکه‌وتنه‌ی بۆ گه‌نجه‌ ماندووه‌کانی خۆی کرده‌ دیاری که‌ به‌ سه‌ر میسر و سووریا و ئه‌رده‌ن و فه‌له‌ستینییه‌کان و سوپای عیراقدا به‌ ده‌ستی هێنا. دوای نۆزده‌ ساڵ له‌ دروستبوونی، ئیسرائیل توانی جۆلان و سینا داگیر بکات که‌ ئێستا به‌ لالووته‌وه‌ له‌ سه‌ریان گفتوگۆ ده‌کات و بۆ ئه‌وه‌ی جه‌سته‌ی مردووی سه‌ربازێکی خۆی ده‌ست بکه‌وێته‌وه‌، سه‌د گه‌نجی عاره‌ب ئازاد ده‌کات... ئێمه‌ له‌ یادی نۆزده‌ ساڵه‌ی دروستبوونماندا باسی ئه‌وه‌ ده‌که‌ین ئاخۆ له‌گه‌ڵ تورکیا و ئێراندا به‌شداری له‌ سووتاندنی قه‌ندیل بکه‌ین یان نه‌یکه‌ین.

چما گه‌مه‌یه‌ له‌ ناو هه‌موو ئه‌و میلله‌تانه‌دا که‌ له‌ ڕۆژهه‌ڵاتی ناویندا ده‌ژێن ته‌نها کورد وڵاتی دابه‌ش کرابێ و داگیر کرابێ! نه‌ده‌بوو تورکیای تێکشکاوی یه‌که‌م جه‌نگی جیهانی به‌ سه‌ر بولگاریا و یۆنان و کوردستان و ئه‌رمه‌نستاندا دابه‌ش بکرێ؟! نا، ئه‌وه‌ کارێکی ئاسان نه‌بوو چونکه‌ تورک به‌رگرییان ده‌کرد به‌ڵام دابه‌شکردنی کوردستان زه‌حمه‌تییه‌کی ئه‌وتۆی تێدا نه‌بوو. بیده‌نه‌ ده‌ستی وه‌لی ئه‌مره‌وه‌!

ئه‌وه‌ی ئێستا له‌ کوردستاندا ده‌یبینین خه‌سڵه‌تی له‌ مێژینه‌مانه‌ و جێی سه‌رسوڕمان نییه‌ یه‌کتر بۆ داگیرکه‌ر و کوردکوژ بکوژین و وه‌ک تاژی ڕاوی یه‌کتریان بۆ بکه‌ین.

ئه‌و ده‌روازه‌ بازرگانییانه‌ی به‌ ڕووی کوردستاندا کراونه‌ته‌وه‌ و بوونه‌ته‌ منه‌ت به‌ سه‌ر خه‌ڵکدا، حوکمی تێکشکانمان ده‌ده‌ن و چاره‌نووسی ڕه‌شمان دیاری ده‌که‌ن. ئێمه‌ هیچ به‌رهه‌مێکمان نییه‌ و ده‌روازه‌ ژه‌هراوییه‌کانمان له‌ سه‌ر دابخه‌ن، یه‌کتر ده‌خۆین. کوردستان، په‌نیر و میوه‌ و سه‌وزه‌ له‌ تورکیا و ئێرانه‌وه‌ دێنێ و ئه‌وان ده‌وڵه‌مه‌ند ده‌کا تا بۆ له‌ناوبردنمان خێراتر و به‌هێزتر بن. به‌ هۆی چه‌کدارییه‌کی بێسووده‌وه‌، که‌ گه‌نجانی کورد سه‌رقاڵین، ته‌نانه‌ت کرێکارێکی خواسایی له‌ کوردستاندا نییه‌ و ده‌بێ عاره‌بی ته‌عریب کرێکاریمان بۆ بکات و پیلانی مه‌حکه‌میش بۆ ڕۆژێکی دابنێ بارمان ده‌که‌وێته‌ لێژی. هه‌ر باوباپیری ئه‌وان بوون بۆ خوێفرۆشتن و ته‌للابی ده‌هاتنه‌ کوردستان و دوایی بوونه‌ بکوژی کورد و تاڵانچی گونده‌کان و داگیرکه‌ری خاکه‌که‌مان... ئه‌وان بوون تۆوی زڕی 140یان له‌ خاک و دڵی کورددا چاند.

ده‌بوو دوای نۆزده‌ ساڵ، ئێستا گفتوگۆ له‌ سه‌ر عوزێم و شاره‌بان بکه‌ین ئاخۆ هی کوردن یا هی عاره‌ب، که‌چی با داخه‌وه‌ گفتوگۆمان له‌ سه‌ر ڕووخاندن و نه‌ڕووخاندنی ڕه‌حیماوه‌ی که‌رکووک و سووتاندن و نه‌سووتاندنی کچه‌کانی قه‌ندیله‌! ده‌بوو ئێستا به‌رهه‌می خۆماڵیمان سه‌روزیادمان بێ که‌چی ده‌رمانسازی خۆمان، به‌ هۆی ژه‌هری تورکییه‌وه‌ بازاڕی که‌ساده‌. کورد نه‌ له‌ ئازایه‌تی که‌مه‌ نه‌ له‌ زانست، به‌ڵام به‌ داخه‌وه‌ ئاستی دڵسۆزی بۆ نه‌ته‌وه‌ و نیشتمانه‌که‌ی که‌وتۆته‌ خوار هیچه‌وه‌!

ئیسرائیل دوای نۆزده‌ ساڵ جۆلان و سینای داگیر کرد و ئێمه‌ دوای نۆزده‌ ساڵ، خوا یار بێ قه‌ندیل داگیر ده‌که‌ین! ئه‌وه‌شی ڕازی نابێ، ده‌یده‌ینه‌ به‌ر به‌ردی یاسا و تۆڵه‌ی به‌رودواوه‌ی لێ ده‌که‌ینه‌وه‌! خۆزگه‌ ئێمه‌ش بنگوریۆنێک یا ئه‌تا کوردێکام ده‌بوو! به‌ڵام کوڕینه‌ نیتمان!

کە ئەوە حاڵی موسوڵمانان بێ، جوولەکە چۆن ببنە موسوڵمان؟!

نووسینی کچە ئەندازیاری جوولەکەی یەمەنی: نەجات نەهاری (نجاة النهاري)

زۆر کەس داوایان لێ کردووم دەستبەرداری باوەڕی خۆم ببم و ببمە موسوڵمان و زۆر کەسیش هەموو ڕۆژێ نەفرەتیان لێ کردووم و بە کافر ناویان بردووم و گوتوویانە ئەوەی موسوڵمان نەبێ چارەنووسی ئاگری خوایە.

هاوڕێیەکم چیرۆکێکی جوانی لە بارەی محەمەدی پێغەمبەر و جوولەکەیەکەوە بۆ ناردم کە دراوسێی بووە و ئازاری داوە و پێغەمبەریش بەرانبەری بەپشوو بووە. کاتێکیش جووەکە نەخۆش دەکەوێ، پێغەمبەر دەچێتە سەردانی. کابرای جوولەکە لەو ڕەوشتە زۆر شەرمەزار دەبێ و دەبێتە موسوڵمان. کە ئەو چیرۆکەم خوێندەوە تێگەیشتم کە ڕەفتار و ڕەوشتی محەمەدی پێغەمبەر، بۆ جوولەکەکە پێوەر بوونە تا ئیسلام سەرنجی ڕابکێشێ و پێش ئەوەی تەنانەت ناوەڕۆکی قورئانیش بخوێنێتەوە ببێتە موسوڵمان. چەند چرکەیەک بیرم کردەوە: دەبێ ئەمڕۆ موسوڵمانان بە چی سەرنجی جوولەکە ڕابکێشن تا ببنە موسوڵمان؟

هیوادارم قسەلەڕووییم تووڕەتان نەکا، چونکە من هەوڵ دەدەم بەو شێوەیە لە ئیسلام بگەم کە ئەو جوولەکەیە پێش قسەی قورئان، بە هۆی ڕەفتارەکانی پێغەمبەرەوە لێی تێگەیشتووە و بۆتە موسوڵمان... لە سێ خاڵیشدا بابەتەکە دەخەمە ڕوو:

((یەکەم)) ئەمڕۆ موسوڵمانەکان لە سەر چەندین مەزەبن و هەر یەکە و ئەوی تر بە کافر دەزانێ و خوێنی حەڵاڵ دەکا. ئەگەر بمەوێ – وەک جوولەکەیەک – ببمە موسوڵمان، ئایە لە دەرگای "سوننەوە بچمە ژوورەوە یا لە دەرگای "شیعەوە یا لە دەرگای مەزەبەکانی ترەوە؟ لە کامەیاندا بە ئاسوودەیی دەژیم و خەڵکی سەر بە مەزەبەکانی تری ئیسلام خوێنم حەڵاڵ ناکەن؟

لە بەیرووت، لەگەڵ کچێکی هاوڕێمدا باسی ئەوەم کرد کە هاوڕێکانم داوام لێ دەکەن ببمە موسوڵمان. لە کاتی دەمەتەقێدا بە سەرسوڕمانەوە زانیم موسوڵمانەکان قسەیەکی پیرۆزی پێغەمبەر دەڵێنەوە کە موسوڵمانان دەبنە (٧٠) بەشەوە و خوا هەموویان عەزاب دەدا یەکێکیان نەبێ، کە دەچێتە بەهەشتەوە. پرسیاری ناوی ئەو بەشەم لە هاوڕێکەم کرد ، ئەویش گوتی کە نایزانێ و یەک موسوڵمانیش نییە بیزانێ بەڵام هەر دەستەیە و پێی وایە مەبەست لە خۆیەتی..!!

لە خۆمم پرسی، ئاخۆ ئەگەر جوولەکەیەک بیەوێ ببێتە موسوڵمان، بچێتە لای کامە بەش تا ببێتە موسوڵمان؟ ئەی کام زانای موسوڵمان تەواو دڵیای دەکا بچێتە ئەو دەستەیەوە کە خوا عەزابی نادا؟ ئەمە سەرکێشییەکی گەورە و زۆر مەترسیدارە.

(دووەم)) ئەمڕۆ موسوڵمانەکان لە هەموو شوێنێک، لە ناو خۆیاندا یەکتر دەکوژن و زۆر بێڕەحمانە یەکتر سەردەبڕن.. جوولەکە جۆن باوەڕ بێنێ و ببێتە موسوڵمان لە کاتێکدا دەبینێ موسوڵمان بە هۆی هەمان ئاینەوە برای موسوڵمانی خۆی دەکوژێ، لە کاتێکدا کەستان نەتانبیستووە جوولەکە بە هۆی هەمان دینەوە یەکتر بکوژن، بەڵکو بە پێچەوانەوە، ئیسرائیل بە هۆی دینەوە وەک دەوڵەت دامەزرا.

پێش دوو ڕۆژ ڕاپۆرتێکم خوێندەوە کە لە لایەن چەند دەوڵەتێکی عارەبی موسوڵمانەوە درابووە نەتەوە یەکگرتووەکان، باسی ٨٠ هەزار موسوڵمان دەکا کە تەنها لە ماوەی دوو ساڵدا لە سووریا بە دەستی موسوڵمان کوژراون، جا چ لە لایەن ڕژێمەوە بێ یا بەرهەڵستکارانەوە. کرتەیەکی ڤیدیۆیی شەڕکەرێکی بەرهەڵستکارم دیت، دڵی سەربازێکی دەردەهێنا و دەیخوارد – واتە موسوڵمان دڵی برای موسوڵمانی خۆی دەخوارد.!!

هەروەها سەرژمێریم لە سەر کوژراوەکانی شەڕی مەزەبیی ناوخۆی عیراق خوێندۆتەوە کە ژمارەیان بە پتر لە ٢٨٠ هەزار کوژراوی عیراقی مەزەندە دەکرێ و زۆرینەی هەرە زۆریشیان موسوڵمانن و ژمارەیەکی کەمیان دیانن.

بەو دوو نموونەیە واز دێنم و بیرکردنەوە و ڕامان و پرسیار بۆ ئێوە جێ دەهێڵم کە چۆن جوولەکەیەک یا مەسیحییەک ببێتە موسوڵمان و دڵنیابێ، لە کاتێکدا ئەوە حاڵی موسوڵمانان بێ؟ لەگەڵ ئەوەشدا تەواو دڵنیام ئەوەی ڕوو دەدا لە بەر ڕۆشنایی ئیسلام ڕوو نادات چونکە هەموو ئاینە ئاسمانییەکان بانگهێشە بۆ ئاشتی دەکەن.

((سێیەم)) کاتێ موحەمەد پێغەمبەر داوای لە خەڵک دەکرد ببنە موسوڵمان، تەمای ئازادی و دڵنیایی و ڕەهابوون لە (زوڵم و نەخوێندەواری و هەژاری )ی وەبەر دەنان و ڕایدەکێشان بۆیە خەڵک دوای کەوتن. بەڵام ئەمڕۆ کە موسوڵمانەکان داوا لە لە جوو دەکەن ببنە موسوڵمان، تەمای چییان وەبەر دەنێن؟

با لە قساندا ڕوون و ڕاستگۆ بین: زۆربەی دەوڵەتە عارەبییە ئیسلامییەکانمان، هەژاری و نەخوێندەواری و زوڵم و دەستدرێژی سەر مافی خەڵک تیایاندا تەشەنەیان کردووە و گەشەسەندن و پەرەسەندنی ئابوورییان تێدا نییە و ئەگەر وا نەبوونایە شۆڕشی بەهاری عارەبی بەرپا نەدەبوو. کەچی ئەو دەوڵەتانەی مەسیحی و جوو بەڕێوەیان دەبەن و لە لایەن هەندێ خەڵکەوە بە کافر ناوزەد دەکرێن، بوونەتە جێی سەرنجی موسوڵمانان تا ڕەویان بۆ بکەن و کاریان تێدا بکەن یا تیایاندا بژێن.. نەک هەر ئەوە، تەنانەت جلی ژێرەوەش بۆ موسوڵمانەکان دروست دەکەن.. بشمبوورن مەبەستم لەمەیان گاڵتەپێکردن نییە بەڵکو دانپێدانان و ڕوونی بۆچوونە بەرانبەر ئەو واقیعەی ئەمڕۆ دنیای تێدا دەژێ!

ڕاستە من جوولەکەم، بەڵام ڕێزی ئیسلام دەگرم و بە پێی باسکردنی هاوڕێکانم بێ دەستوورێکی مەزنی ژیانی مرۆڤایەتی تێدا هەیە و وابەستەبوونم بە باوەڕی خۆمەوە، وەک هەندێ کەس بۆی دەچن کفر نییە. هاوڕێیەکم دەقێکی قورئانی بۆ ناردم کە دەیسەلمێنی خاوەن دینەکان کافر نین و ئەو دەقەش دەڵێ: ((ليسوا سواء من اهل الكتاب امة قائمة يتلون آيات الله آناء الليل وهم يسجدون))! 

ڕاتان چییە؟

سەرنج: من لە بۆچوونەکانی ئەو کچە جوولەکە یەمەنییەم نەکۆڵیوەتەوە تا بزانم لە کوێدا هەڵەی کردووە یان نەکردووە. گوتارەکە سەرنجی ڕاکێشام چونکە کچە جوولەکەیەک نووسیویەتی کە ئێستاش خۆی بە خەڵکی یەمەن دەزانێ. هیوادارم سەردانی فەیس بووکەکەی بکرێ چونکە لە لایەکەوە پڕە لە عەشق بۆ یەمەن و خەڵکی یەمەن، لە لایەکی ترەوە ڕەخنەی ئیسرائیلییەکانی دێتە سەر و ڕەخنەشیان لێ دەگرێ.

سەرچاوە:  https://www.facebook.com/AlmhndstNjatAlnhary?fref=ts

موسوڵمانی تۆخ و موسوڵمانی کاڵ

لە ڕاستیدا، کێشەی من لە سەر ئەم گۆی زەوییەدا، نە دینە، نە چینە! نە ژینگەیە و نە ژن و ئازادی ژن و مافەکانی ژنە! کێشەی سەرەکی من کێشەی میللەتێکە، نە پیاوی ئازادە تا باسی ئازادی ژنەکانی بکرێ، نە کیان و کارگەی هەیە تا باسی چینەکانی بکرێ. ئەوەی ئێستاش هەیە، سبەینێی نادیارە و کەس نازانێ ئاخۆ کەی ناوچە ڕزگارکراوەکانیش دەچنە پاڵ ناوچە داگیرکراوەکانی ترەوە. کە ئاوهاش بێ، هەرچی هاوارێک بۆ مافی ژن و ئازادی فەلەستین و پاکڕاگرتنی ژینگە و بەرگریکردن لە موسوڵمانەکانی بۆرما و بەزەیی بەرانبەر ئاژەڵ بکەین، دەنگدانەوەی تەنها لە ئەشکەوتی کەللەی خۆماندا دەبێ و نە کەس دەیبیستێ و نە کەس دەیەوێ بیبیستێ تا بە دەنگمانەوە بێ!

بەڵام، پرسیار ئەوەیە ئاخۆ کوردی ئیسلامی، واتە (ئەو کوردانەی کە لە ناو حیزبی ئیسلامیدا ڕێکخراون) لە ئاستی دنیادا، بەرەیەکی دینی ئیسلامین بەرانبەر لادینی و نادینی؟! واتە چەند لە حیزبێکی ئیسلامی عارەبی یا تورکییەوە نزیکن، ئەوەندەش لە لایەنێکی نادینی میللەتی خۆیانەوە دوورن؟!

باوەڕ ناکەم ئەوەندەی لە بەرەی عارەبی ئیسلامیدان، ئەوەندە لە بەرەی ئیسلامی ناعارەبدابن! بەڵگەشم ئەوەیە ئەوەندەی بۆ خەڵکی میسر و مورسی بەخەمن، بۆ خەڵکی بورما (میانمار) بەخەم نین کە دەیان هەزار کەسیان بە ناهەق لێ کوژران... من پێم وایە حیزبی ئیسلامی کوردی لە پەراوێزی حیزبە ئیسلامییە عارەبییەکاندان و ئەوان بۆ هەرچییەک بە خەم بن، ئەمانیش بۆی بەخەم دەبن و بەرانبەر هەرچییەکیش خەمسارد بن، ئەمانیش لێی خەمسارد دەن! کە ئیخوانی میسر کاردانەوەیەکی ئەوتۆی بۆ موسوڵمانانی بۆرما نەبوو، ئەمانیش، وەک (تابع الامام)، کاردانەوەیەکی ئەوتۆیان نەبوو. مادام ئیخوانی میسر یا هەر ڕێکخراوێکی تری ئیسلامی عارەبی بەرانبەر کوشتاری کورد خەمساردن و بەهەندی ناگرن، ئەمانیش خەمسارد دەبن و بە هەندی وەرناگرن. بۆ مەسەلەی نەوەکانی تاریقی کوڕی زیادی ئەمازیغیش هەر وان.

دەیان هەزار موسوڵمانی بورما، بە دەستی بوودییەکانی ئەو وڵاتە کوژران. جیاوازی لە نێوان ژن و منداڵ و پیاو و گەنج و پیردا نەکرا، بەڵام هیچ کاریگەرییەکی لە سەر حیزبە ئیسلامییەکانی کوردستان نەبوو، چونکە کاریگەرییەکی ئەوتۆی لە سەر حیزبە ئیسلامییە عارەبەکان نەبوو. موسوڵمانە بۆرماییەکان، خەڵکێکی بێ کیان و بێ دەوڵەتن و دەکوژرێن! زەرەری نییە!

ئاگادارین کە لە سەروبەندی ئەنفالدا، کۆنگرەی ئیسلامی لە کوێت بەسترا، کەچی لەو کۆنگرە پان و بەرینەدا، بەو هەموو زانا و دانا و عالیمەوە، یەک چپە لە بارەی ئەنفالی کوردەوە نەکرا. کەواتە دەبێ حیزبی ئیسلامی کوردیش چپە نەکەن و بە تاوانی ئەنفال بڵێن: تاوانی بە ناو ئەنفال!

وەک مرۆڤێک، هەستی مرۆڤانەم بۆ ئەو تاوانانەی بۆرما ئازارم دەدا، نەک هەستی موسوڵمانبوونم. کاتێ دەزانم لە ئەوروپا جووەکانیان لەبەر ئەوە دەکوشت کە پێیان وا بوو وەک مشک تاعوون بڵاو دەکەنەوە، ئازاری مرۆڤانەم پێ دەگا. کاتێ ژنە فەلەستینییەکیش دەبینم ئامێز بە دار زەیتوونێکدا دەکا تا ئیسرائیلییەکان بە شۆڤڵ هەڵینەتەکێنن، وەک مرۆڤێک، ڕۆحم ئازار دەبینێ! بەڵام ئێمەیش وەک ئەو فەلەستینییە دارمان بڕاوەتەوە و ئێمەیش وەک بورماییەکان قڕ کراوین و ئێمەیش ئاوارەی دەستی بەشەری ترین، کە جارێ بە یاسای شۆڤیەنیزم قڕمان دەکەن و جارێ بە پێی یاسای ئیسلام ئەنفالمان دەکەن!

ئێمەی کورد و موسوڵمانانی بورما و ئەمازیغی ئەفریقیا، موسوڵمانی کاڵین و لە هەندێ ڕووەوە بە یەک دەچین... ئێمە و ئەوان، لە پەراوێزی عارەبدا، هەندێ جاری بە دەگمەن، نەختێ دیار و زۆربەی جارانیش تەواو بزرین. ئەوەی جێی سەرنج بێ ئەوەیە کە کورد و موسوڵمانە بورماییەکان و ئەمازیغ، وەکو یەک، هەم موسوڵمانن هەم بێ دەوڵەت و هەم پشتگوێ خراوون. بزانە تورکەکان و فارسەکان ئاوها دەخرێنە پەراوێزی عارەبەوە!! نا، هەندێ جار عارەب لە پەراوێزی ئەواندان. وایە ئیدی! کە تۆ خۆت خۆتت نەوێ، خەڵکی تر بۆچی بتیانەوێ؟!

ئەوەی من لە حیزبە ئیسلامییەکان دوور دەخاتەوە، شێوەی باوەڕ نییە، بەڵکو ئەوەیە کە من دەمەوێ کورد بابەت بێ و ئەوان دەیانەوێ پەراوێز بێ! جیاوازی جەوهەریمان گەلێ زۆرە. خۆ من دەزانم ئەوان خوایەک و شەرعێکیان هەیە، لە دزیکردن ڕێگرییان لێ دەکەن و لەو ڕووەوە جێی ئومێدن، بەڵام کە نەیانەوێ کورد ببێتە خاوەنی نیشتیمان و سامانی خۆی، ئەو پاکژییەش بەکەڵک نامێنێ! کە میللەتەکەت هیچی نەبێ، چی لێ دەدزریت؟! با باسی ئەو دزییانەش نەکەین کە ئێستا دەکرێن چونکە ئەوە دزیکردن نییە بەڵکو کرێی ڕێنماییکردنی دزانە بۆ سەر خێروبێری نیشتیمانی خۆیان.

ئیسلامییەکان، نە ئیسلامییەکی ڕاستەقینەن نە نیشتیمانپەروەری ڕاستەقینە. بە هۆی عارەبەوە پشتی ئەو موسوڵمانانە ناگرن کە عارەب پشتیان ناگرێ و بە هۆی حیزابەیتی دینیشەوە، پشتی میللەتی خۆیان بەرداوە!

ئێستا ئەم هەواڵەم خوێندەوە: "گروپێكی ئیسلامی كه‌ له‌ پاكستان و ئەندەنوسیا و تاڵیبان و چه‌ند وڵاتێكی تر دروست بووە بۆ تۆڵەكردنەوەی مسوڵمانانی بۆرما ڕویان كردە ئەو وڵاتە". من لە ئێوە دەپرسم: بۆچی ناوی سعوودییە و میسر و تورکیای تێدا نییە؟ خۆ ئاشکرایە ناوی ئەوانە هەبوایە، ناوی کوردیش لە پەراوێزیاندا دەبوو!

خوا ئەوانیش و ئێمەش بهێنێتە سەر ڕێی ڕاست بۆ خزمەتکردنی خاک و نیشتیمان و... ئاینی خۆمان!

تەماشاکە بزانە ئەم تاوانانە بۆچی لای ئیسلامییەکانی کوردستان بزر، یا مەیلەو بزرن:

 

تاوانی بوودییەکانی بۆرما، عارەب لێی بێدەنگن و کوردیش باسی ناکا

ئەنفال (تاوانی عارەبی موسوڵمان). عارەب لێی بێدەنگن

و کوردیش پێی دەڵێن "بەناو ئەنفال"

کوشتاری ئەرمەن - تاوانی تورکی موسوڵمان (لای تورکەکان غەزا بووە)

عارەب لێی بێدەنگن.

کەچی ئەمەیان قەت کۆن نابێ!

سەبرە و شاتیلە... تاوانی ئیسرائیل بەرانبەر عارەب

خۆ هەموو ئەوانە تاوانن و بە دەستی مرۆڤ ئەنجام دراون. چۆن قەبووڵمان بێ هەندێکیان پەردەپۆش بکرێن و هەندێکیان بخرێنە ڕوو؟! ژمارەی شەهیدانی سەبرە و شاتیلە، نە هێندەی کوردە ئەنفالکراوەکان دەبێ نە هێندەی موسوڵمانە بۆرماییەکان و نە هێندەی ئەرمەنەکان و نە هێندەی شەهیدانی هەڵەبجە. بەڵام لای حزبە ئیسلامییەکانی عارەب گرنگترن چونکە عارەبن!

ئەوەی نیشتیمانی خۆی بە لاوە پیرۆز بێ، ئەم وێنەیە دەیهەژێنێ.

لە سایتی کچە جوولەکەیەکەوە وەرگیراوە

کامپ بەغدا و کامپ دەیڤد

کامپ دەیڤد و کامپ بەغدا

حەکیم کاکەوەیس

مورسی ڕۆییشت. هەندێ کورد ئەوەندەیان پێ ناخۆشە، دەڵێی ئێستا دەوڵەتی ماد ڕووخاوە. هەندێکی تریش هێندەیان پێ خۆشە، دەڵێی کوردستان بۆتە دەوڵەت. منیش نە بە هاتنی مورسی دڵم خۆش بوو، نە بە ڕۆیشتنی. ئاخر ئێمە چ مانگامان لە گاگەل نەبێ، بۆچی پێمان بەفر بیبا؟! مەسەلە کوردییەکە دەڵێ: گوتیان حوشتر کوڕت بوو، گوتی: بوو نەبوو کەڕەپوو! ئەو بارەی لە منە هەر لە منە!

ئێمەی کورد، لە سایەی کام خەلیفەی ئیسلامیدا حەساینەوە؟ سەردەمی عومەری کوڕێ عەبدولعەزیزی لێ دەرچێ (هەی هەزار جار خودای لێ ڕازی بێ)، هەر لە سەردەمی ئیمامی عومەرەوە ئێمە کەوتووینەتە بەر سمی ئەسپی لەشکری عارەب هەتا ڕۆژی ئەمڕۆ! خەلیفەی عوسمانییەکان چییان بە سەردا نەهێناین تا ئێستا دڵمان بە خەلیفە ئۆردوغانی تورک خۆش بێ؟ ئەی ئەمەوییەکان و عەبباسییەکان چییان لێ نەکردین تا دڵمان بە محەمەد مورسی خۆش بێ؟! تۆ بڵێی محەمەد مورسی لە ئیمامی عومەر و خالیدی کوڕی وەلید و کوڕانی ئەبوو سوفیان و عەباسییەکان موسوڵمانتر و دادپەروەرتر بێ!! تۆ بڵێی جێی عومەری کوڕی عەبدولعەزیزی گرتباوە!!

هاتنی مورسی و ڕۆیشتنی، هەروەها هەرچی پێیان گوت بەهاری عارەبی، گەمەی سەر تەختە شەترەنجی ئەمەریکایە و ئەوانە پێ بزانن یا نەزانن، گەمەیان پێ دەکرێ. ئەو بەهارە عارەبییەی دڵی خەڵکی خۆش کردووە، بە قەولی کاک ئاسۆس شەفیق، جگە لە بەهاری (سی ئای ئەی)، بەهاری کەسی تر نەبوو. خەڵکی میسر، ئەگەرچی زۆرینەیان موسوڵمانی سوننە مەزەبن، بەڵام ئاین و ئاینزای تریشیان تێدا هەن. ئەگەر مورسی هێندەی عومەری کوڕی عەبدولعەزیزیش بێگەرد بێ، شوێنکەوتووانی مورسی، خۆیان وەک هەمەج درخست. چییان نەکرد؟!

ئاخر من کە بە ناوی خودا و پێغەمبەر گۆش کرابم، چ ئازایەتییەکی خۆمی تێدایە ئەگەر موسوڵمان بم. کەسێکیش بە ناوی مەلەک تاووس گۆش کرابێ، چی بکا کە  ئێزیدییە؟! قیپتەکانی میسریش کە بە خاچ و ناوی مەریەم و عیسا گۆش کراون، چی بکەن؟! ئیتر مرۆڤ ئاوها لە نێوان باوەڕەکاندا سەرگەردانە تا دەگاتە مانگاپەرستی، دەنا ئەو (سینا)یەی عەبدولناسر بە دڵسۆزی دۆڕاندی و سادات بە خیانەتکردن و کامپ دەیڤد وەریگرتەوە، هی ئەوە بوو ئیخوانەکان سادات بکوژن؟! ئەی بۆ ئیخوانەکانی کورد، لە سەر کامپ بەغدای (١٩٩١)ی سەرانی کورد کەسیان نەکوشت، کە هیچ بستە خاکێکیشیان پێ نەگەڕاندەوە؟! پێم ناڵێی کوێی کامپ بەغدای سەرانی کورد لە کامپ دەیڤدی سادات شەریفتر و چاکتر بوو؟! ئیخوانی ئێمە نەک هەر لە سەر کامپ بەغدا کەسیان نەکوشت، بگرە بوون بە پاڵپشتیشیان.

ئیسلامییەکانی کوردستان لەگەڵ خوادا سوڵحاون بەڵام نە لەگەڵ یەکتردا دەسوڵحێن نە لەگەڵ عەبدەکانی تری خوادا! ئەگەر مەرج بێ هەموو کارێکمان بۆ ئەوە بێ بیکەینە زەخیرەی قەبر و پێشباری قیامەت، دیارە بەرانبەر بە ئەمەریکای تاغووتی دنیاخۆر و دنیاویست دۆڕاو دەبین کە هەموو کارێکیان بۆ زەخیرەی ئەم دنیایەیە. تەنانەت تا نەوتی وڵاتان وەستابێ، نەوت لە خاکی خۆشیان دەرناهێنن و بۆ نەوەکانی داهاتوویان هەڵیدەگرن، کەچی ئێمە ئەوەندە بۆ دەرهێنانی نەوت پەلەمانە، بکرابا بە دوو ڕۆژ چۆڕبڕمان دەکرد! ئیتر چۆن لەم دنیایەدا ئەمەریکا بە سەر هەموو جیهانی ئیسلامیدا زاڵ نابێ و چۆن گەمەی شەترنجی پێ ناکا؟! خاوەن تەڵەی ڕاستەقینەش ئەو ڕۆژە دێ کە دەوڵەتە عارەب و ئیسلامیەکان نەوتیان نەمێنێ!... 

ئەوەی دەمێنێتەوە ئەوەیە دڵمان خۆش بکەین: ئەی قوڕ بە بان سەریان! بزانە لەو دنیا خوا چییان پێ دەکا!! باشە! خوا لەم دنیا بە ئێمەی دەکا و لەو دنیاش بەوان... ئیتر دیارە دابەش کراوە و دەبێ بە بەشی ئەم دنیایەی خۆمان ڕازی بین و هەتا هەتا و پشتاوپشت هەر کۆیلە و کلک و موالی و زەلیل بین!

ناوچە داگیرکراوەکان

ناوچە داگیرکراوەکان

لە ململانێی دەسەڵات و بەرهەڵستکاردا

ئەوانەی لە کوردستاندا دەسەڵاتیان بە دەستەوەیە، ئەوەندەی سەرقاڵی مانەوەی خۆیانن لە سەر کورسیی دەسەڵات، هەزاریەکی ئەوە بیر لە چارەنووسی ئەو نیوەیەی باشووری کوردستان ناکەنەوە کە خۆیان لە ڕێی ماددەی (١٤٠)ەوە گەیاندوویانەتە سەر مێزی قومارێکی دۆڕاو. ئەوانەش کە بەرهەڵستکارن و دەیانەوێ دەسەڵات بە دەست بێنن، ئەوەندەی بیر لە بەدەستهێنانی دەسەڵات دەکەنەوە، بیر لە چارەنووسی ئەو پارچەیەی نیشتیمانەکەمان ناکەنەوە. بەرهەڵستکار، کە دەیەوێ دەسەڵاتی هەبێ، بۆ بەدەستهێنانی لایەنگر، جاروبارێ باسی ناوچە داگیرکراوەکان و ماددەی ژەهراوی ١٤٠ دەکا، بەڵام من لە لای خۆمەوە دڵنیا نیم ئاخۆ ئەگەر دەسەڵات بە دەست بێنێ، بە هەمان شێوە باسی دەکا یا ئەویش دەکەوێتە ماخولانی هێشتنەوەی دەسەڵات بە دەست خۆیەوە و ئەوەی ئێستا دەسەڵاتی هەیە، دەکەوێتەوە باسکردنی ناوچە داگیرکراوەکان!

ئەوەی من لەم ململانێیەی ئەمڕۆی حیزبەکاندا دەیبینم، کێشەی کەرکووک و ناوچە داگیرکراوەکان کەوتۆتە پەراوێزی هەموو پەراوێزەکانەوە و تەنانەت دانیشتوانی ئەو ناوچانە، خۆشیان، لە بیریان نەماوە و ئەمیان بەیداغی سەوز هەڵدەدا و ئەویان بەیداغی زەرد... تەنانەت لە ڕێککەوتنی پارتی و یەکێتیشدا، دزەململانێ و ناتەباییان جاروبار دەردەکەوێ. بە ڕاستی جێی سەرسوڕمانە!

ئەوەی من بە ڕوونیی دەیبینم، هیچ لایەنێ، نە دەسەڵاتدار و نە بەرهەڵستکار، ئەو کەرەسەیە نییە دڵمان پێی خۆش بێ و چارەسەری کێشە نەتەوایەتییەکانمان بکات. ئەگەر وەک نموونە، کێشەی کورد بورغوویەکی ژمارە دە بێ، ئەوا بەرهەڵستکار سپانەی ژمارە هەشتە و بۆ بەستنەوەیی بورغووی ژمارە دە دەست نادا و دەسەڵاتیش ژمارە دوانزەیە و بۆ بەستنەوەی بورغووی ژمارە دە نابێ، وەک کە نەبوو!! جا پێویستە لە سپانەیەک بگەڕێین کە بۆ بورغووی ژمارە دەی چارەنووسمان بگونجێ! ئێوە لە ناو ئەو حیزبانەدا شکی دەبەن؟!

ئاشکرایە لە نێوان پارەداری و دەسەڵاتداری لە لایەکەوە و سەرفرازی کوردستانیش لە لایەکەی ترەوە، حیزبە دەسەڵاتدارەکان بە لای (لای) یەکەمدا دەشکێنەوە و کێشەی نەتەوایی و نێشتیمانی کوردیش، چۆن لە قوڕ چەقیوە، هەر وا دەچەقێ و نالەقێ. ئاین و بەهەشتیش بۆ حیزبە ئیسلامییەکان لە لایەک دابنێین و سەرفرازی نەتەوەیی کوردیش لە لایەکەی تر، بە دڵنیاییەوە حیزبی ئیسلامی لای یەکەم هەڵدەبژێرێ و دیسان دەستخەڕۆ دەبین. بە هەرحاڵ، هەرای دەسەڵات و بەرهەڵستکار بۆ هەریسەی نەوت و کورسی و دۆلارە نەک چارەسەری کێشەی نەتەوایەتی کورد و ئازادکردنی ناوچە داگیرکراوەکانی باشووری کوردستان.

ئاگام لەوەش هەیە ڕێی تێ دەچێ حیزبی ئیسلامی لە ترسی عەزابی دواڕۆژ لە دزیکردندا دەستیان کورت بێ، بەڵام کە هاتن کێشەی کوردێکی گەرمیانی داگیرکراو تێکەڵێ کێشەی عۆجەییەکی ئیماندار بکەن و لە مزگەوتێکی کەرکووکدا، ئەگەر نەشیکەنە ئیمام، نوێژی بە شانەوە بکەن، ئەوانیش نەک هەر چارەسەریان لە لا نییە، بگرە هەزار کوردی کەمدین و ناموسوڵمان دەکەنە قوربانی ئەو عۆجەییە ئیماندارە و ئێمەش بۆ جاری هەزارەم دەستخەڕۆ دەبین!

ماوەتەوە نەوەی نوێ و کوردپەروەرانمان کە بتوانن ئاسۆیەکی سەرفرازی جیا لەو ئاسۆیانە لە بەر هۆشی خۆیان بکەنەوە. ئەو ئاسۆیە، یەکەم هەنگاو و بەسمەلەی، پێویستە ئەمە بێ: هەموو دنیا و هەموو سامانی دنیا و هەموو شتێکی تر بە لایەک، چارەسەری کێشەی کورد بە لایەک... کۆیلایەتی بیست و پێنج سەدە نەبڕێتەوە؟! 

ئەوەی کە دەبوو کورد بۆ سەرفرازی خۆی یەکەم جار تاقی بکاتەوە، ڕێبازی ڕزگاریخوازانەی نەتەوایەتییە، کەچی هەتا ئێستاش، نەکەوتۆتە سەر ئەو ڕێبازە. ناحەزانی ئەو ڕێبازەش حیزبەکانی تری کوردستان، بە پارتی و یەکێتی و لایەنەکانی ترەوە، بە حیزبی نەتەوەیی لە قەڵەم دەدەن تا ئەو بیر و ڕێبازە، ئەوەندەی دەکرێ و مەودا هەیە، سەر دەرنەکەن و چرۆ نەکەن. ڕێبازی نەتەوەیی بەوە عەیبدار دەبێ بە باڵای ئەو حیزبانەی کوردستان ببڕدرێ و کوردی نەتەوەیی هەرگیز ناتوانێ قەبووڵ بکا لە بەغدا هاوپشکێکی پەراوێزی فەرمانڕەوایەتی بێ و بەرژەوەندی نەتەوەکەی ناکاتە قورابانی کورسییەکی پایتەختی کوردکوشتن.

لە کۆتاییدا داوای لێبوردن دەکەم کە ئەوەندە (من من) کەوتە نووسینەکەمەوە. ڕەنگە بابەتەکە وای خواستبێ.